Mga ordinansa kabahin sa real property sa siyudad ipasusi

CEBU, Philippines — Giawhag sa Cebu City Legal Office ang Cebu City Council nga susihon ang kasamtangang ordinansa kalabot sa pagbayad sa real property nunot sa mga hinungdan nga nagdala sa epekto sa Real Property Valuation and Assessment Reform Act (RPVARA).

Sa ilang tubag sa usa ka resolusyon sa konseho, ang legal nga opinyon nga gipirmahan ni Lawyer Luigine Christi Chan, ang city legal nag-ingon nga pipila ka mga property sa siyudad ang nagpakitag delinquency sa pagbayad ug nagrekomendar sa paghimo og mga collection remedies.

Niadtong Hunyo 20, 2024, ang Konseho sa Dakbayan sa Sugbo niawhag sa pag-usab sa gisugyot nga ordinansa sa giusab nga Real Property Tax (RPT) ug gilangan una ang mga diskusyon niini nunot sa gipirmahan nga nasudnong balaod nga milabaw sa mga probisyon niini, ang RPVARA.

Kini human si Konsehal Rey Gealon, Chairman sa Committee on Laws sa Sangguniang Panlungsod mihatag sa iyang privilege speech aron masaysay ang mga kalambuan nga wala mahiuyon sa gisugyot nga ordinansa kabahin sa RPT nga gimugna ni Konsehal Noel Wenceslao.

Subay niini, si Gealon nipasaka og mosyon, nga nagmando sa Cebu City Legal Office sa paghatag og legal nga opinyon sa mga mahinungdanong probisyon sa RPVARA ug isumite kini sulod sa 15 ka adlaw.

Ang city legal nihatag og gibug-aton nga bisan pa nga ang Bureau of Local Government Finance (BLGF) mao na ang muhimo sa Real Property Valuation Service o kantidad sa mga bag-ong property tax, imbes nga itugyan kini nga butang ngadto sa mga local assessors ug lokal nga mga magbabalaod, ang lokal nga kagamhanan aduna usab usa ka real property valuation unit (RPVU)) ubos sa City Assessor.

Ang city legal nagkanayon sab nga ang pag-andam sa Schedule of Market Values (SMV) nagkinahanglan og dugang requirements aron makita ang epekto sa kita sa siyudad ug epekto sa mga magbubuhis.

Giklaro usab sa City Legal nga pinaagi sa RPVRA, kining updated values wala magpasabot nga mas taas ang buhis ug dugang pa nga ang mga lokal nga kagamhanan makahimo sa pag-adjust sa assessment level ug tax rates aron maminusan ang epekto sa katawhan.

Katapusang gi-update sa dakbayan sa Sugbo ang RPT rates niadtong 2003, nga gipatuman lamang niadtong 2006 tungod sa daghang mga deferment ordinance.

Matod nila, sa kasamtangang schedule sa market values, assessment level, ug tax rates, aduna nay pipila ka mga property nga na-forfeit pabor sa City Government apan wala makompleto ang documentation ug registration procedure niini. (BANAT NEWS)