Kapitolyo nigama og MOA alang sa suplay sa kuryente sa Malapascua

CEBU, Philippines — Si Gobernador Gwendolyn Garcia sa Probinsiya sa Sugbo nigama og kasabotan tali sa Cebu II Electric Cooperative (CEBECO II) nga gipresentahan ni Lowell Belciña, general manager sa CEBECO II alang sa pag-asumer sa Probinsiya sa Sugbo sa responsibilidad sa paghatag og igo nga suplay sa kurente sa Isla sa Malapascua, Lungsod sa Daanbantayan.

Ang pinirmahay sa MOA gipahigayon sa covered court sa Barangay Logon, Lungsod sa Daanbantayan.

Matud sa Capitol Information Office nga mao kini ang unang higayon nga ang usa ka lokal nga kagamhanan mahimong power provider.

Ang probinsiya maoy mohulip sa Powersource Philippines, Inc. (PSPI) sa pagsuplay og kuryente sa Malapascua human nga napakyas ang PSPI paghatag og igong suplay sa kuryente sa niaging mga bulan nga nakaapekto sa mga residente ug patigayon sa isla nga giila isip tourism destimation.

Sayo pa, ang Kapitolyo nipadala og upat ka generator sets nga adunay 500 KVA nga kapasidad matag usa aron matubag ang peak demand nga 2 megawatts human sa pagkapakyas sa PSPI hinungdan sa pagka-terminate sa kasabotan sa maong kompaniya tali sa CEBECO II.

Ubos sa ulahing MOA mohatag og kompleto nga generator sets nga igo sa pasuplay sa gikinahanglan nga kuryente sa Malapascua.

Sa maong kasabotan, ang Kapitolyo maoy mosiguro nga maayo ug mamentinar ang operasyon sa generator sets samtang ang CEBECO II maoy obligado nga maayo ug hapsay ang distribution facilities apil ang poste, wires, transformers, ug household meters.

Ang pagpinirmahanay sa MOA gisaksihan nila ni  Daanbantayan Mayor Sun Shimura, Department of Energy representative Elmer Tasong, National Power Corporation Visayas head Timoteo Diacor, ug Malapascua Business Association president Anna Reed lakip sa pipila ka residente sa isla.

Atol sa maong pinirmahanay, si Garcia nihangyo sa mga residente nga mopasensiya tungod kay wala pa makompleto sa Kapitolyo ang mga legal nga rekisitos aron hingpit na ang operasyon sa probinsiya isip power provider.

Matud usab ni Garcia nga dili angay mabalaka nga moburot ang bayranan sa kuryente subay sa maong kalamboan gumikan kay wala mosulod ang Kapitolyo sa maong kasabotan aron magnegosyo.  (BANAT NEWS)