944 ka tag-iya og sari-sari store nisalmot sa SSSAP
CEBU, Philippines — Niabot ngadto sa 944 ka sari-sari store owners gikan sa rehiyon-7 ang nisalmot sa ikaduhang sesyon sa Sari-Sari Store Advancement Program (SSSAP) nga gihahigayon sa Department of Trade Industry (DTI). Ang ikaduhang module nga nag-ulohan og “e-Level Up ang Online Marketing,” nagpaila sa lain-laing mga estratehiya sa marketing ug mga plataporma nga magamit sa epektibong pagpamaligya sa mga sari-sari store.
Nakig-alayon ang DTI- 7 sa Department of Information and Communications Technology (DICT), local government units, ug partner cooperatives aron magamit ang ilang mga pasilidad isip venue sa kalihokan.
Gitambongan ang live viewing session sa 944 ka partisipante nga nagtapok sa 37 ka learning centers, lakip ang DTI provincial offices ug Negosyo Centers diin 442 ka tag-iya og tindahan gikan sa Cebu, 239 sa Bohol, 216 sa Negros Oriental, ug 47 sa Siquijor.
Samtang ang uban nitan-aw pinaagi sa Facebook page sa DTI Philippines ug YouTube.
Anaa usab sa mga learning center ang mga partner merchant sa tibuok nasud nga nagtanyag og diskwento nga mga oportunidad sa pagbaligya alang sa mga tag-iya og tindahan naglakip kini sa Smart ug Nestle nga niresulta sa kinatibuk-ang halin nga Php 255,640.00.
Kini nga inisiyatibo kabahin sa five-module program nga gitawag og “Tindahan Mo, e-Level Up Mo!” nga nagtumong sa pagsangkap sa mga ‘saripreneur’ sa mahinungdanong kahibalo ug pagpadali sa ilang operasyon sa negosyo pinaagi sa digital nga mga solusyon.
Matud ni DTI Secretary Alfredo Pascual nga ang SSSAP nagtumong sa paghatag og oportunidad sa kapin sa usa ka milyon nga mga nagtag-iya og sari-sari store sa Pilipinas pinaagi sa pagpausbaw sa digital transformation, financial literacy ug sustainable business practices aron mahimong mas lig-on, innovative ug competitive ang Micro, Small, and Medium Enterprises ( MSMEs). Ipahigayon kini sa kataposang Miyerkules sa matag bulan hangtud sa Oktubre 2024, diin ang unang module nga nag-ulohan og “e-Level Up ang Negosyo,” gisugdan niadtong buwan sa Mayo niining tuiga samtang ang umaabot nga mga module naglakip sa "e-Level Up ang Puhunan" sa Agosto 28, 2024; "e-Level Up ang Paninda", Septiyembre 25, 2024; ug "e-Level Up ang Operations" sa Oktubre 23, 2024. (BANAT NEWS)
- Latest
