BFAR mopatuman sa lagda sa modern fisheries management

CEBU, Philippines — Naghimo karon og mga lakang ang Bureau of Fisheries and Aquatic Resources Central Visayas aron masuta kaabunda sa mga isda sa kadagatan.

Ang BFAR-7 padayon sa paghimo og mga plano sa mga kinahanglan nga buhaton aron maprotektahan ang mga isda sa kadagatan nga sakop sa Fisheries Management Area nga gilangkuban sa Cebu Strait ug Camotes Sea.

Ang focal person sa BFAR-7 FMA-10 Johann Friedrich Tejada nibutyag nga tumong sa pagpalig-on sa kadagatan nga magpabiling abunda ang mga isda pinaagi sa pagpatuman sa mga lagda subay sa modern fisheries management nga magbase sa scientific information o datos nga makolekta diin maoy gamiton sa fisheries framework.

Ug pinaagi sa fisheries framework dinhi masuta kong asa dapita, unsay klase sa isda nga pwedeng kuhaon ug kanos-a ang panahon nga kinahanglang managat lakip ang pag-regulate sa gamiton sa pagpanagat aron dili mahurot ang gidaghanon sa isda.

Nag-unang isda nga anaa sa FMA 10 mao ang tamban, tulingan, budboron ug uban pa.

Si Tejada niawhag sa mga mananagat nga tabangan sila sa pag-conserve sa pipila ka mga klase sa isda aron magpabilin kining abunda tungod kay mao kini kasagaran tinubdan sa pagkaon. (BANAT NEWS)