Duha patay, duha angol sa aksidente

CEBU, Philippines — Patay  ang kanhi barangay  kapitan sa Barangay  II sa lungsod  sa Tuburan ug grabe usab nga naangol  ang anak niining  lalaki human ang pickup truck nga ilang gisakyan nabangga  sa dump truck sa ilang paghidagat sa National Highway sa Sitio Kampo, Barangay Dalid sa Lungsod sa Tabuelan.

Sumala pa ni Police Captain Amory Napoles, hepe  sa  Tabuelan Police Station ang namatay mao si Vicente  Mangabon Pontillas,  52, ug naangol  ang anak niining si Michael Guipo  Pontillas, 25, nga giingong maoy nagmaneho  sa ilang sakyanan.

Paingon sila sa Barangay  Logo  sa Sogod apan paghidangat sa maong dapit kalit lang gikabangga niini ang dump truck nga gimaneho usab ni Richard Dacua Matugas, 27  anyos nga taga Barangay Marmol sa Lungsod sa Tuburan.

Ang drayber   sa dump truck nga si Matugas mitahan sa kapolisan ug gikatakdang pasakaan og kasong reckless imprudence resulting to homicide, physical injuries ug damage to property.

Motor vs trak

Samtang patay sab ang 37 anyos nga babaye  ug naangol ang 16 anyos nga lalaking angkas niini human nadasmagan ang ilang motor sa usa ka trak sa gobiyerno niadtong Hulyo 27, 2024 sa Brgy. Guinacot purok Timbangan Danao City.

Ang namatay mao si Menirva Giangan Ubanan, nga maoy nag drive sa motor samtang ang angkas nga naangol mao si Niño Jay Adlawan Bueno,  taga Cebu Lower, Quisol, Purok Santan, Danao City.

Ang nakadasmag kanila mao si Teudolo Benitez Capuyan, 64 anyos, usa ka government employee, nagpuyo sa Brgy. Dunggoan Sitio Dry Dock, Danao City.

Matud ni Police Staff Sergeant Arzie Hill Biatingo nga ang mga biktima gikan sa Poblacion Danao padulong na unta mouli sa bukirang dapit sa Danao ang mga biktima sa dihang nahitabo ang aksidente.

Si Capuyan gikan sa Barangay Cahumayan padulong mouli sa Poblacion apan samtang nagliko kini sa kurbadahon ug dangog nga bahin sa karsada nawad-an kini og kontrol ug nadasmagan ang duha.

Human nabanggaan ang motor nalahus kini ngadto sa gate sa usa ka balay.

Si Ubanan nadala pa sa ospital apan nakaangkon kini og kadaut sa ulo ug gideklarar nga patay na sa attending physician sa Danao Provincial Hospital.

Samtang si Bueno, nakaangkon og daghang bali sa lawas ug gidala sa University of Cebu Medical Center (UCMED).

Si Capuyan naa sa  kustodiya sa kapulisan ug gikatakdang pasakaan og kasong reckless imprudence resulting to homicide, physical injury, ug damage to property.

Giawhag ni Biatingo ang mga motorista nga mag-amping, magsul-ob og helmet ug dapat dunay presensya sa hunahuna samtang magmaneho. (BANAT NEWS)