P24M declogging machine gituki sa konseho

CEBU, Philippines — Gituki sa Cebu City Council ang procurement request alang sa P24 milyones nga balor sa declogging machines nunot sa kakuwang sa comprehensive nga effective ug efficiency breakdown nga niresulta hinuon sa pag defer niini.

Kini naggumikan sa resolusyon ni Konsehal Jerry Guardo nga nisang-at sa resolusyon og nangayo sa kinatibuk-ang budget nga P26 milyones alang sa declogging machines nga nagkantidad og P24 milyones ug plotter na P2 milyones.

Kini nga mga ekipo gamitonon pagtubag sa pagbaha. Atol sa diskusyon, gihangyo ni Minority Floor Leader, Konsehal Nestor Archival Sr. si Guardo sa mga kapabilidad sa maong ekipo.

Si Guardo mipasabot nga mga high-powered jet kini nga adunay duha ka compartments nga kayang mosuyop og mga bara sa mga kanal.

Ang mga high-powered jet matud niya gamiton sa pagbomba sa drainage gamit ang suction machine aron makuha ang mga nabarang basura.

“Currently right now, using manual man ang atong cleaning and our people can no longer reach ang katong mga clogged area,” matud pa ni Guardo.

Si Konsehal Franklyn Ong niingon nga ang dakbayan aduna niini nga makina nga gidumala sa Department of Public Services (DPS) apan wa pa kini ma-update kun mogana pa.

“My point is if we are going to buy this kind of machine that is P24 million and we do not have people to manage it, to have people (taught) how to use it and we don’t have people to maintain it that’s a waste of money,” matud ni Archival.

Gisugyot hinuon ni Archival nga mangabang na lang og mga ekipo imbes nga mopalit og lain.

“So kinahanglan ni siya og technical person, so we buy these machines unya wa tay technical person, ang end view ani guba ra gihapon so we will be throwing good money,” matud pa sab ni Konsehal Mary Ann de los Santos.

Si Majority Floor Leader, Konsehal Jocelyn Pesquera miingon nga naandan na nga kung aduna nay procurement ang gobyerno, ipatuman gyud ang training sa mo operate niini.

“We can only say that, but it never happened, kadaghanan naa tay paliton, dali kaayong maguba,”tubag pa ni Archival.

Samtang nagpadayon ang diskusyon, namatikdan ni Konsehal Pastor “Jun” Alcover nga ang mga pangutana gipadayag tungod kay wala’y visualization sa mga ekipo.

“This is one thing Mr. Chairman, nag order ta og usa ka makina ug wa ta kahibaw og unsay mugawas ani, unsay makita nato ani , because we are just basing the things that probably we have read…ang ako lang is how effective it is?” dugang pa ni Archival.

Dugang pa, samtang gipadayag ni Pesquera ug Archival nga mopili sa pag-abstain kun iduso ni Guardo ang pagpa approve niini sa konseho, iya nalang kining gi withdraw tungod sa kakuwang sa mga eksplinasyon kabahin sa kapabilidad sa maong makina.

Giaprobahan sa konseho ang pag withdraw sa resolusyon. (BANAT NEWS)