Ordinansa alang sa towing giaprobahan sa siyudad sa Talisay

CEBU, Philippines — Dako nga kantidad sa multa ang mapahamtang ngadto sa motorista nga magpataka og parking sa Dakbayan sa Talisay.

Kini human naaprubahan na ang ordinansa alang sa pag tow ug pag clamp sa mga sakyanan nga makabalda sa dagan sa trapiko.

Si konsehal Danny Caballero, chairman sa committee on traffic management maoy nagpapasar sa ordinansa diin niagi og daghan nga committee hearing.

Matud pa ni Caballero nga tinguha sa ordinansa mao ang paghawan sa karsada aron lahos-lahos ra ang mga sakyanan nga walay makabalda.

Base sa ordinansa, ang pagtow sa sakyanan mokantidad kini gikan sa P1,000 ngadto sa P6,000 magdepende sa gidak-on sa sakyanan ug adunay bayranan usab nga storage fee matag adlaw.

Hinuon gipasabot ni Caballero nga hatagan og higayon nga tawagon ang drayber sa sakyanan nga pataka og parking.

Apan kun dili gyud mopatim-aw ang drayber diha na nila kini i clamp ug i towing.

Si Jonathan Tumulak, pangu sa City of Talisay-Traffic Operation Development Authority (CT-TODA) nitataw nga makigsabot pa ang siyudad og usa ka pribado nga kompaniya nga maoy moguroy sa mga sakyanan. (BANAT NEWS)