Prayer Rally kontra divorce bill gihimo sa Cebu City

CEBU, Philippines — Mga magtutuo sa Archdiocese of Cebu ang niapil sa gipahigayon nga Prayer Rally sa Archdiocese of Cebu nga gi-organisar sa Commission on Family and Life kagahapon Sabado sa hapon nga adunay tema Yes to Marriage and the Family; No to Divorce.

Bisan sa padagumon nga kalangitan ug pagtaligsik sa uwan nagmartsa dala ang ilang mga placards nga adunay mga mensahe bahin sa kamahinungdanon sa pamilya ug ilang pagsupak Divorce Bill.

Ang prosisyon nanukad gikan sa Fuente Osmeña ngadto na sa Basilica Minore del Sto. Niño uban sa mga imahe nila ni Sts. Louis and Zelie Martin, St. Joseph, Our Lady of Guadalupe, ug Sñr Sto. Niño.

Mga kabataan, magtiayon ug ilang mga anak uban sa mga Obispo ug mga pari ang niduyog sa prayer rally.

Si Fr. Elly Suico, ang pangulo sa Commission on Family and Life nagpasalamat sa pagtubag sa mga Sugbuanon sa ilang panawagan nga batukan gayud ang pagpasar sa hingpit sa divorce bill. Iyang gipahibalo nga bisan kadtong mga magtutuo sa Bantayan Island ug Camotes Island naghimo og ilaha usab nga prayer rally sama niini.

Ang maong prayer rally gitapos sa usa ka Santos nga misa nga gipangulohan ni Cebu Archbishop Jose Palma uban sa mga kaparian sa Archdiocese of Cebu.

Miabot na og 157,840 ka pirma sa mga tawo sa Archdiocese alang sa kampanya sa “Yes to Marriage, Yes to the Family, and No to Divorce.”

Ang maong mga pirma giduso na ni Fr. Carmelo Diola, member, Core Committee ngadto sa Senado.

Ang Pilipinas ug ang Vatican sa Roma ang nagpabiling mga nasud sa kalibutan nga walay diborsiyo.