IRR pagpadali sa promosyon sa mga magtutudlo pirmado na
CEBU, Philippines — Gipirmahan na ni Department of Education (DepEd) Secretary Sonny Angara ang bag-ong Implementing Rules and Regulations (IRR) alang sa Expanded Career Progression System nga nagsiguro sa propesyonal nga kalambuan sa mga magtutudlo ug kinatibuk-ang kalidad sa edukasyon sa nasud, niadtong Hulyo 26, 2024, sa Bulwagan ng Karunungan sa DepEd Central Office.
Ang bag-ong IRR subay sa Executive Order 174 ni Presidente Ferdinand Marcos Jr. nga nagtinguhang mapasayon ug paspas ang promosyon sa mga pangpublikong magtutudlo sa nasud, pinaagi niini, wa nay magtutudlong moretiro nga Teacher I lang gihapon.
Atol sa pinirmahay, si Secretary Angara giubanan nilang Budget Secretary Amenah Pangandaman, Civil Service Commission (CSC) Chairperson Karlo Nograles, ug Professional Regulatory Commission (PRC) miingon nga dako kaayo og ikatabang sa mga magtutudlo ang maong kamandoan.
Ubos sa IRR, ang Classroom Teaching Career Line maglakip na sa dugang mga posisyon sa pagtudlo sama sa Teacher IV (SG 14), Teacher V (SG 15), Teacher VI (SG 16), Teacher VII (SG 17), ug Master Teacher V (SG 22).
Sa mga nagtinguha og administratibong posisyon, ang career path maglakip sa mga streamlined nga posisyon sama sa School Principal I, School Principal II, School Principal III, ug School Principal IV.
Ang mga kwalipikado sa Master Teacher I makapili sa pagpadayon sa pagtudlo o pagbalhin sa administrasyon sa eskwelahan, nga nagtugot kanila sa pagkuha og mga leadership role ug pagpalambo sa pagdumala sa eskwelahan.
Sa laing bahin, ang DepEd makigtambayayong sab sa Department of Budget and Management (DBM) aron mapalig-on ang proseso sa reclassification diin dili na sa bakanteng posisyon maoy basihan sa promosyon kondili ang ilaha gyud merit ug competence.
Ang ahensya makigtinabangay sa CSC ug PRC aron i-standardize ang mga kwalipikasyon para sa mga posisyon sa pagtudlo gikan sa basic education hangtud sa senior high school aron usa ra ang sistemn ug patas para sa tanan. (BANAT NEWS)
- Latest
