Polis gipusil patay sa bataR

CEBU, Philippines — Patay ang usa ka off-duty nga polis  human kini gipusil og 16-anyos nga batang lalake nga iyahang gibadlong aron papaulion kay lawom na ang kagabhion diha sa P. Remedios Street, Barangay Banilad, sa dakbayan sa Mandaue kagahapon sa alas 12 sa tungang gabii.

Ang biktima mao si Police Staff Sergeant Orvin Felicio, nadestino sa Police Station 5 sa Mandaue City Police Office(MCPO).

Matud ni Police Lieutenant Colonel Mercy Villaro, tigpamaba sa Mandaue City Police Office nga ang biktima padung unta sa Barangay Banilad kay kuhaon niya iyahang asawa.

Apan paglabay niini diha sa dalan P. Remedios nakita niya ang mga tanod nga sakay sa patrol nga nisita sa mga menor de edad tungod sa curfew ordinance.

Gikataho nga sa pagsita sa mga  batan-on nipalayo matud pa ang maong menor de edad apan nabantayan kini ni Felicio maong gigukod niya kini luwan sa iyang motorsiklo.

Sa dihang naapsan sa maong polis ang batan-on ug gisultihan bahin sa curfew gikatahong gitan-aw lang niini si Felicio.

Sa dihang padung na unta i-park sa maong polis ang iyang motor mibunot og armas ang batan-on ug gipusil si Felicio kinsa naigo sa tuo nga kamot ug sa ulo hinungdan sa pagkahagba niini kauban sa iyang motor.

"Gisita ra gyud siya tungod sa kahadlok kay armado man siya, naa man siya'y. 38 nga kalibre nga armas iyaha kining gipusil," sigon ni Villaro base sa giingong tubag sa menor de edad dihang ilang gipangutana human nitahan.

Pasakaan sa kapulisan og kasong murder ang maong menor de edad bisan sa iyang edad apan mag-agad kini base sa assessment sa social workers. Giingong miyembro og gang ang maong batan-on.

Nasayran nga human misibat ang menor de edad niadto kini sa iyahang maestro sa Cabancalan nga nagpuyo sa Talamban ug didto kini mi-surrender u gang maong magtutudlo na maoy mitawag sa kapolisan aron pagkuha kaniya.

"Nakig coordinate man ta sa iyahang ginikanan, sa mama aning minor wala pa siya kahibawo at first pero kadugayan naka communicate ra sila through messenger sa iyahang anak nga mao na ni surrender na diay siya sa iyahang teacher sa Cabancalan. Diri nagpuyo atubangan sa Sto. Niño Village diri sa Talamban, didto siya ni surrender ug didto ra sad siya gikuha," ni Villaro pa.

Ang armas nga gigamit sa menor de edad wala na ma recover kay matod pa gilabay niya kini.

Si Police Staff Sergeant Felicio nga taga Lungsod sa Consolacion nasulod sa Philippine National Police niadtong 2008 ug 15 ka tuig na sa serbisyo.  Aduna kini duha ka mga anak.

Ang grupo sa maong batan-on mao sab ang grupo nga nalambigit sa mga duguong karambola ug pinusilay sa nangaging mga buwan diha sa lungsod sa Consolacion nga nikalas sab og kinabuhi sa ilang mga miyembro.-- Rowena Capistrano ug Romeo Limpangog/IBM (BANAT NEWS)