Mga kompaniya mohatag og 4.3 ektaryang luna sa probinsiya

CEBU, Philippines — Moabot sa 4.3 ka ektarya sa premium reclaimed properties o luna ang makuha sa Probinsiya sa Sugbo gikan sa upat ka reclamation projects nga himuon sa nagkadaiyang lungsod ug siyudad sa probinsiya.

Atol sa tigom ni Gobernador Gwendolyn Garcia tali sa upat ka kompaniya ang niila na sa mga property nga ihatag ngadto sa probinsya nga kabahin sa ilang i-reclaim nga luna.

Ang Global Business Power sa Dakbayan sa Toledo nigahin na og 6,826 metro kwadrado nga bahin sa luna ngadto sa probinsiya; ang Mabuhay Flicement ug Solid Earth Development Corp. nga parehong anaa nakabase sa Lunsod sa San Fernando ang mohatag og 7,192 metro kwadrado nga luna ug 4, 442 metro kwadrado nga property ngadto sa Kapitolyo samtang ang Cebu South Harbor sa Siyudad sa Talisay ang mohatag usab og 25,000 metro kwadrado nga luna ngadto sa probinsiya.

Ang paghatag og gahin sa reclaimed property ngadto sa probinsiya subay kini sa ordinansa sa Probinsiya sa Sugbo nga nag-require sa mga kompaniya nga mopahigayon og reclamation sa mga lungsod sa Probinsiya sa Sugbo nga mogahin og 10 porsyento sa ilang reclaimed lot ngadto sa Kapitolyo.

Ang maong paghatag pormal nga iendorso sa mga kompaniya ngadto sa Economic Enterprise Council nga gipangulohan ni Garcia.

Ang maong paghatag og gahin sa luna makadugang kini sa asset sa Probinsiya sa Sugbo. (BDB) BANAT NEWS