COA mikwestyon sa wa magamit nga mga ekipo sa CCMC

CEBU, Philippines — Gi-flag down sa Commission on Audit (COA) ang kapin sa P83.609 milyones nga mga ekipo nga wa magamit sa Cebu City Medical Center (CCMC).

Samtang gi-postpone ang executive session aron hisgutan ang kalangay sa pagtukod sa CCMC ug ang mga naipon nga pundo tungod sa giingong unauthorized representation.

Niadtong Hunyo 26, 2024, usa ka executive session ang gipatawag ug nag-imbitar kang Dr. Peter Mancao, CCMC Officer-in-charge, ang Department of Engineering and Public Works (DEPW) aron mahatagan ang City Council sa mga update ug tanang kompletong plano, updates sa tanang biddings, ug tanang Program of Works and Estimates (POWE) ug uban pa bahin sa CCMC.

Kagahapon (Miyerkules), Hulyo 24, 2024, ipahigayon unta ang executive session diin gipahibawo ni Konsehal Nestor Archival Sr., ang minority floor leader sa konseho sa dakbayan nga nakadawat sila og mga plano sa miaging tuig alang sa CCMC sama sa mga sketches apan dili pa kini kompleto.

Matud pa usab ni Archival nga sa bag-ohay nga report sa COA, gipakita nga ang “inadequate planning and management of resources” niresulta sa wala paggamit sa lain-laing mga ekipo nga gituyo nga gamiton sa CCMC nga gipalit tulo ngadto sa upat ka tuig ang milabay.

Gipasabot usab nila nga niadtong Marso 14, 2024, ang Audit Team nipahigayon og onsite inspection sa CCMC building.

Miingon sab ang COA nga gipalit kini nga mga ekipo, gihatud, ug nadawat sa siyudad sa mga tuig 2020 ug 20221.

Girekomendar dayon sa mga state auditor nga ang management, pinaagi sa DEPW ug ang CCMC Hospital Administration, mag-coordinate ug mohimo ug mga lakang aron mapaspasan ang pag-instalar ug paggamit sa maong mga ekipo.

Samtang, atol sa gikatakdang schedule sa executive session, gipahibalo ni Konsehal Mary Ann de los Santos nga wala diha ang mga tawo nga ilang giimbitar nga mobarog isip resource speakers. Si Konsehal Jerry Guardo, ang chairman sa konseho alang sa Committee on Infrastructure niingon usab nga si Engr. Bo Varquez kinahanglan usab nga imbitahon, ug midugang nga siya ang adunay kahibalo bahin sa mga donasyon alang sa CCMC.

Sa ngalan ni Mancao, si Attorney Ken Sayrodin, special assistant on legal matters ang nibarog atubangan sa konseho og misulti sa iyang kaandam nga motubag sa mga pangutana sa CCMC ilabi na sa pundo nga mga donasyon gikan sa pribadong tawo nga natigom sa Cebu Medical Society (CMS).

Bisan pa nga adunay representante gikan sa DEPW, ang executive session giuswag ngadto sa Agosto 7, 2024 tungod kay gipili sa konseho nga madungog ang mga update gikan mismo ni Mancao. (BANAT NEWS)