Pangulong Marcos miwadwad sa mga nahimo sud sa tulo ka tuig

CEBU, Philippines — Sa iyang ikatulo nga State of the Nation Address (SONA), mihatag og deklarasyon si Presidente Ferdinand “Bongbong” Marcos sa pipila ka mga isyu karon sa nasud.

Apil sa iyang pamahayag mao ang pag ban o hingpit na nga pagpahunong sa Philippine Offshore Gaming Operators (POGO) lukop nasud nga matud niya miabusar ug way pagtahod sa mga balaod sa nasud.

Nakadawat pud og lanog nga pakpak ang pamahayag sa Presidente sa kusganong pangangkon niini nga ang Pilipinas maoy nanag-iya sa West Philippine Sea (WPS) nga gustong ilugon sa China.

“Ang West Philippine Sea ay hindi kathang isip lamang, ito ay atin,” matod ni Marcos kinsa nagkanayon nga samtang padayon ang paninguha sa gobyerno sa Pilipinas mapanalipdan ang sovereign rights niini sa WPS, ang diplomatiko nga pamaagi nga nasubay sa internasyonal nga balaod maoy angay gihapon ipatuman sa pagsulbad sa paginilugay sa maong lugar.

 Gitaho pud ni Marcos ang mga nahimo sa iyang administrasyon sulod sa tulo ka tuig.

Sa panarbaho ug panginabuhian, misaka matud pa ang employment rate ngadto sa 95.9% samtang ang “underemployment mikunhod gikan sa 11.7% sa bulan sa Mayo sa tuig 2023 nahimo na lang kini nga 9.9% nga maoy pinakaubos nga porsyento sa unemployment sukad sa tuig 2005.

Ubos sa Pantawid Pamilyang Program (4Ps), 420, 000 ka pamilya ang nakagradwar niini sa niaging tuig, sobra 4, 000 kanila mga lisensyado na nga mga magtutudlo karon ug 35 ang mga topnotchers sa board exams.

Pag-abot sa edukasyon, si Marcos nagkanayon nga hagit karon sa bag-ong gitudlo nga kalihim sa Departamento sa Edukasyon ang mapalambo pa ang sistema ug kalidad sa edukasyon sa nasud.

Matud niya, ang kalidad mag-agad sab sa kalidad sa mga magtutudlo kay sila ang pundasyon sa sistema mao nga gigahinan og pundo ang “career progression system” sa mga pampublikong magtutudlo aron ma-promote sila.

“Sa sistemang ito, wala nang public school teacher na magre-retire na Teacher 1 lamang,” matud ni Marcos.

Apil sa mga gihimo sa gobyerno karon aron matabangan ang mga magtutudlo mao ang pagpasar sa “Kabalikat sa Pagtuturo” Act na maghatag og tinuig nga teaching allowance sugod sunod tuig, Personal Accident Insurance ug Special Hardship Allowance ang mga pampubliko nga mga magtutudlo.

Ipatuman sab ang digitalization ug mga reporma sa edukasyon gamit ang teknolohiya apil niini ang paggamit og solar power sa mga eskuylahan.

Sa panglawas, gipahibalo niya ang kalampusan pagbukas sa 20 ka Ambulatory Service (BUCAS) Centers lukop nasud.

Sa PhilHealth, gipatas-an ang benepisyo alang sa acute stroke ug mga pasyente sa pulmonya,. Gikan sab sa P100,000, gisaka sa sa P1.4 million sab ang coverage  sa mga pasyente sa breast cancer.

Gisaad niya nga sa dili pa matapos ang tuig, maapil sa coverage sa PhilHealth ang chemotherapy alang sa dunay mga kanser.

Pag-abot sa internet, si Marcos nagkanayon nga ubos sa Free Internet Wi-Fi program, dul-an 10 milyones ka mga devices ang nakagamit sa libreng internet sa 13, 000 ka lugar sa Pilipinas.

Nakompleto na ang Phase 1 sa National Fiber Backbone ug gipabot nga matapos ang Phase 2 ug Phase 3 sa tuig 2026.

Kabahin sa enerhiya, giangkon niya nga mahal gyud ang bill sa kuryente dinhi sa nasud kun itandi sa uban.

Iyang gipahibalo nga ang inugurasyon sa transmission lines sa Mariveles-Hermosa-San Jose, Cebu-Negros-Panay ug Dumanjug-Corella Line.

Pag-abot sab sa kampanya batok sa ilegal nga drugas, si Marcos mihulagway nga malampuson gihapon kini bisan og walay nangamatay.

“Our bloodless war on dangerous drugs adheres and will continue to adhere to the established ‘8 Es’ of an effective anti-illegal drugs strategy. Extermination was never one of them,” matud sa presidente.

Matud niya sa kapin 71,000 ka anti-illegal drug operations, moabot sa P44 bilyones nga ilegal nga drugas ang nasakmit ug kapin 97 mil ang nadakpan.

Kapin 6, 000 niini ang mga high-value targets, 440 mga empleyado sa gobyerno ug 77 ang mga elected officials.

Miani sab kini og masipang paka gikan sa mga nanambong.

Natapos ni Marcos ang iyang ikatulo nga SONA sulod sa usa ka oras ug 22 ka minutos. (BANAT NEWS)