Kamatayon sa turistang babaye sa olango ipasusi

CEBU, Philippines — Gitinguha ni Lapu-Lapu City Mayor Junard "Ahong" Chan ang pagpahigayon og pakiusi labot sa kamatayon sa usa ka 43 anyos nga babayeng turista nga naaksidente sa jumping balloon activity sa Pinkys Floating Cottage Rental sa sitio Basdako, sa Barangay San Vicente sa Isla sa Olango sa siyudad sa Lapu-Lapu.

Ang aksidente nahitabo niadtong Hulyo 11, 2024 ug ang biktima giila nga mao si Catherine Paypa Egam, turista nga taga Cagayan de Oro City.

Nasayran sa kapolisan nga gidala ang maong biktima sa Sta Rosa Community Hospital apan gibalhin kini ngadto sa usa ka pribadong tambalanan sa Siyudad sa Sugbo.

Apan gideklarar kining namatay niadtong Hulyo 19 2024.

Gipasabot ni Mayor Chan nga iyang ipasusi ang maong insidente aron mahimoan og mga lakang nga dili na masubli ang maong panghitabo.

Nunot niini iyang gipadayag nga adunay himoong panagtagbo sa tanan nga mga operators alang sa pagtuki ug malakip na usab niini ang kaluwasan sa mosalmot sa maong water sports activity.

Nasuta sa imbestigasyon nga gihimo sa kapolisan nga milukso ang biktima sa jumping balloon ug sa pikas tumoy ang staff member nga si Jford Ontong milayat usab nga maoy hinungdan sa pag-rebound sa biktima ug naapantok ang ulo niini. (BANAT NEWS)