Lain laing serbisyo gihatud sa Mandaue ngadto sa kabarangayan
CEBU, Philippines — Nagkadaiyang matang sa serbisyo ang gihatod sa kagamhanan sa siyudad sa Mandaue ngadto sa mga molopyo sa 27 ka barangay sa Dakbayan.
Kini pinaagi sa programa ubos sa Barangayan Program diin gihatud ang mga serbisyo sa Mandaue City Hall og gipaduol sa katawhan.
Sa Barangay Looc Gym gipahigayon ang libreng mga serbisyo nga naglakip sa Mandaue City Health Office pinaagi sa City Nutrition Office diin gipanghatag ang dental kits ug mga vitamins samtang libre nga konsulta sa ngipon ug medical consultation gihimo sa Mobile Clinic.
Libreng hilot ug tupi ang gihatag nga serbisyo gikan sa MCCTEST.
Ang Persons with Disability Affairs Office (PDAO) naghatag og Assistive Devices sama sa wheelchairs diin duha ka benepisyaryo ang nakadawat niini.
Ang Office of Senior Citizens Affairs (OSCA) naghatag og wheelchair diin usa ka benepisyaryo ang nakadawat ug duha ang nakadawat og sungkod samtang duha usab ang nakadawat og booklet. Ang Mandaue City Cooperative Development Office naghatag usab og Livelihood Training Scholarship alang sa Soap Making.
Mga seedlings usab ang gipanghatag gikan sa City Agriculture’s Office.
Adunay serbisyo gikan sa Public Employment Service Office, City Legal Office, Local Civil Registrar’s Office, Business Permit and Licensing Office ug uban pa.
Mokabat sa 30 ka mga benepisyaryo sa Livelihood Seed Capital ang nakadawat og 300-Mil pesos ug adunay nahatagan og financial assistance.
Si Mandaue City Mayor Jonas Cortes mismo ang nangulo sa paghatod sa libreng mga serbisyo sa Barangay Looc kauban usab si Vice Mayor Glenn Bercede
Lakip sa nitambong sa Barangayan Program ang City Councilors nga sila si Maline Cortes-Zafra, Jen Del Mar, Jimmy Lumapas, Malcolm Sanchez, Oscar Del Castillo, ABC President Dante Borbajo, ug Looc Barangay Officials pinangulohan ni Kapitan Raul Kevin Cabahug. (BANAT NEWS)
- Latest
