Cause-oriented nipasangil kang Marcos nga pakyas sa katungdanan

CEBU, Philippines — Sa pagpahigayon ni Presidente Ferdinand “Bongbong” Marcos, Jr. sa iyang ikatulong State of the Nation Address (SONA), ang Cebu-based advocacy group nideklara nga pakyas si Marcos sa iyang ikaduhang tuig nga paglingkod sa katungdanan.

Ang cause-oriented group nagtigom kini diha sa Saint Alphonsus Convent Conference Room sa Redemptorist Church, Dakbayan sa Sugbo aron ipadayag ang ilang mga reklamo sa wala matuman nga mga saad sa presidente.

Ang Kilusang Magbubukid ng Pilipinas (KMP) Cebu Chairperson Nick Abasolo nipadayag sa iyang pagkadiskontento sa wala matuman nga saad nga P20 matag kilo sa bugas ug nanawagan sa tinud-anay nga land reform ug local industrial growth.

Base sa Facebook post sa Aninaw Productions gikwestiyon ni Abasolo ang import practices sa gobiyerno taliwala sa nagkagrabe ang food insecurity.

“Sa krisis sa hisgutanan sa pagkaon, ang gihimo ni Bongbong Marcos, mao ang importasyon, nga para namong mag-uuma, usa ka band-aid nga solusyon. Dako kaayo ni nga tamparos sa atoang pagka-Pilipino isip usa ka nasud sa agrikultural”, padayag ni Abasolo.

Sa laing bahin, si Howell Villacrucis, secretary general sa Alyansa sa mga Mamumuo sa Sugbo-Kilusang Mayo Uno (AMA Sugbo-KMU) nipasangil nga si Marcos walay gihimong saad sa labor sector sukad sa sinugdanan diin gipasagdan ang mga panginahanglanon sa mga mamumuo sama sa patas nga suholan ug wala matubag ang job security.

“Simple ra ang pangayo sa mamumuo, una ang makabuhing suholan; ikaduha ana ang regular nga trabaoho. Ug sa kana nga mga hisgotanan, wala na matubag ni Marcos”, matud ni Villacrusis.

Base sa datos sa IBON Foundation nagpakita nga ang typical nga pamilya nagkinahanglan kini og P1,200 matag adlaw aron matubag ang ilang inadlaw nga panginahanglanon diin labaw kini sa P468 nga minimum nga suholan sa Central Visayas.

Si Greg Perez, chairman sa PISTON Cebu nisaway sa PUV modernization program sa gobiyerno diin iyang gitumbok nga nakahatag og kalisod sa mga drayber ug gagmay’ng operators ang kamahal sa imported nga mga sakyanan ug naghatag usab kini og hulga sa ilang panginbuhian.

Nanawagan usab siya alang sa mga palisiya sa pampublikong transportasyon nga progresibo, nasyonalista, ug nakatutok sa masa tungod sa pagsaka sa presyo sa lana.

Ang laing Cebu-based advocacy groups sama sa Cebu Urban Poor Women League (CUPWOL), National Union of Students of the Philippines Cebu, Karapatan

Central Visayas, Assert Development Initiatives, Promotion of Church People

Response Cebu (PCPR Cebu) nipadayag usab sa ilang mga yango-ngo kabahin sa mga isyu gikan sa social inequality ngadto sa tawhanong katungod.

Karong adlawa, ang grupo nag-organisar kini sa ilang kaugalingong People’s SONA, diin magpahigayon sila og march rally nga manukad sa Fuente Osmeña Circle sa alas 9:00 sa buntag ug ilang ipresentar ang ilang mga yango-ngo ug paghatag og alternatibong panglantaw sa official ng SONA ni Marcos. The Freeman