Wala ka remit gipatay
![Wala ka remit gipatay](https://media.philstar.com/photos/2024/07/19/patay_2024-07-19_20-02-48.jpg)
CEBU, Philippines — Usa ka lalaki nga giingong nalambigit sa ilegal nga drugas ang gipusil patay pasado alas-4 sa kaadlawon kagahapon, Biyernes, Hulyo 19, 2024 sa Sitio Tuburan, Barangay Punta Princesa, siyudad sa Sugbo.
Ang biktima nailhan sa ngalan nga Joshua Sy nga taga Sitio Callejon, Barangay Labangon apan giingong nag-abang kini sa Barangay Punta Princesa. Matud pa sa kapolisan, nalambigit kini sa pagpamaligya og ilegal nga drugas sa maong dapit.
Sa imbestigasyon sa Labangon Police Station 10 sa Cebu City Police Office (CCPO) ang biktima nag-inom kuyog ang pipila ka residente sa dapit sa dihang dunay usa ka lalake nga nibutho ug kalit gipusil ang biktima.
Nakadagan pa ang biktima apan gigukod kini ug pag-abot sa gamay nga agianan giingong giusban kini pagpusil ug naigo kini sa nagkadaiyang bahin sa iyang lawas.
Matud ni Police Major Eraño Regidor, hepe sa Labangon Police Station 10 nga ang motibo sa krimen may kalambigitan sa illegal nga drugas.
Kini tungod sa nadawat nilang report nga wala maka remit sa matud pa halin sa illegal nga drugas ang biktima ug dugay na kining gihatagan og tagal aron mabayran apan giingong wala gyud makabayad.
Mao kini ang gitutokang motibo sa imbestigasyon sa kapolisan bahin sa nahitabo sa biktima. Nasuta sab nga wala maginusara ang mamumuno tungod kay dunay laing lalaki nga nagsilbing lookout niini dili layo sa nahitaboan.
Dunay nakuha nga unom ka basiyo sa bala sa kalibre .45 ug mga deformed slugs ang nakuha sa kapulisan diha sa crime scene.
Ang kapolisan mibutyag nga nailhan na nila ang suspek apan wala una nila kini gibutyag sanglit nagpadayon ang ilang imbestigasyon sa grupo.--IBM BANAT NEWS
- Latest