Mga namuyo sa sementeryo nagsugod na og biya

CEBU, Philippines — Nagsugod na pagbiya ang mga tawo nga nanimuyo  diha sulod sa Cebu Chinese Cemetery ug Ludo Memorial Park nga nahimutang sa Barangay Carreta, Dakbayan sa Sugbo.

Ang maong mga nanimuyo boluntaryo nga namahawa human sila nagkasinabot sa tag-iya sa maong sam-ang diin gihatagan usab sila og hinabang pinansiyal.

Ang Association of Benevola Inc, nihatag og hinabang pinansiyal ngadto sa mga nanimuyo sa dapit aron aduna sila’y magamit sa ilang bag-o nga puy-anan matud ni Atty. Dean Decal, administrator sa maong kahugpongan.

Si Acting Cebu City Mayor Raymond Alvin Garcia ang nitambong sa paghatag sa pinansiyal nga hinabang nga gikatakdang karong adlaw nga Sabado matapos.

Giawhag ni Garcia ang mga nakadawat og hinabang pinansiyal nga gamiton kini nila sa maayo ang ilang kwarta.

Ang mga nanimuyo nakadawat og P20 mil ngadto sa P50 mil depende sa gidugayon sa ilang pagpuyo sulod sa maong sam-ang.

Ang maong mga informal settler nga nanimuyo sa maong sam-ang gibana-bana nga niukopar sa kapin sa 200 ka istraktura diin kalab-anan anaa sa mausuleum.

Gibutyag ni Decal nga anaa lang sa 173 ka pamilya ang nidawat sa financial assistance samtang adunay 33 nipili ngadto sa relokasyon nga gitanyag kanila.

Ang maong dapit tinguha nga himuon nga heritage park nga gastohan sa pundok sa Benevola. BDB BANAT NEWS