Prime mover midaro sa poste sa traffic lights

CEBU, Philippines — Gidaro sa usa ka prime mover nga dunay kargang tahup ang poste sa traffic light ug kahoy diha sa center island sa Cebu South Coastal Road (CSCR) sa habig sa Barangay Dumlog, Dakbayan sa Talisay niadtong Miyerkules sa hapon.

Ang prime mover adunay trailer nga nagkarga og container van nga adunay sulod nga mga tahop nga nitimbang og 18 ka tonelada.

Ang drayber nga si Ramie Sitoy nga lumad nga taga Bukidnon nagkanayon nga samtang sila nagdagan kalit siya nga giilogan og lane sa laing truck hinungdan nga siya ni-brake apan napadung kini punoan sa kahoy ug sa traffic light hinungdan sa pagkalagpot niini.

Ang truckboy nalagpot ug nilapos sa windshield padung sa gawas sa trak hinungdan sa pagkaangol niini. Hinuon luwas ra sila tanan human nga girespondehan sa mga sakop sa emergency team.

Nakamugna gyud og taas nga kutay sa traffic ang aksidente apan nabalik ra usab sa normal human makuha ang prime mover ug ang nalagpot nga traffic light post. (BANAT NEWS)