Mga atletang Oponganon ug Talisay non gipahalipayan
CEBU, Philippines — Mokabat sa P250 mil nga kantidad nga salapi uban sa certificate of appreciation ang gitunol ni Mayor Junard "Ahong" Chan ngadto sa mga atletang Oponganon nga nakalangkat og medalya sa miaging Palarong Pambansa 2024 nga gipahigayon sa Siyudad sa Sugbo
Sa pagbisita sa maong mga atleta sa iyang buhatan niadtong Miyerkules gitunol sa mayor ang mga pahalipay.
Ang mga atletang Oponganon milangkat og mga medalya nga gold nga adunay cash incentive nga P30 mil, silver P20 mil ug bronze P10 mil.
Naglakip sa mga atleta nga gipahalipayan mao sila si Asia Paraase, Troy Nathaniel Abing, Kent Carlo Icot, Shamler Augusto, Athena Kate Sapio, Amber Jay Notarte ug Cedric Nino Zoilo.
Samtang wala sab magpalupig ang Dakbayan sa Talisay kinsa mihatag sab og pahalipay sa ilang mga atletang nakakuha og medalya agi og pagpasalamt sab kanila.
Si Konsehal Rodi Cabigas, chairman sa committee on sports nibutyag nga adunay ordinansa labot sa paghatag og pasidungog ug pahalipay sa mga atleta nga Talisaynon nga maghatag og dungog sa Talisay ilabi na sa national ug international nga sporting event.
Si Cabigas nibutyag nga ang gold medal adunay madawat nga P20mil, P15mil sa silver medal ug P10mil sa bronze medal.
Sutaon pa sab sa konsehal kung pila ang ilang gitagana alang sa coaches ug trainors apan nakasiguro siya nga naa sab silay ilaha nga pahalipay.
Asoy pa ni Cabigas nga gitahasan siya ni Mayor Gerald Anthony “Samsam” Gullas niini hinungdan nga iya na kining giproseso. Una niini, si AJ Basalo mao ang nakakuha sa gold medal samtang si Justine Trazo nakakuha og silver medal nga pulos sa duwa nga boxing.
Gikuha pa ni Cabigas ang lista sa uban nga Talisaynon nga niduwa sa Palarong Pambansa nga nakakuha og medalya.
Si Konsehal Eduardo “Digul” Gullas III, chairman sa committee on education nipaabot sab sa iyang pahalipay sa mga atletang mga Talisaynon nga nipakita og labok sa ilang mga sporting event.
Siya nanghinaot nga inubanan sa Department of Education (DEPED) ila pa nga mapalambo ang talento sa kabataan sa natad sa paugnat sa kusog. (BANAT NEWS)
- Latest
