25 ka PDL nigradwar sa rehab program sa Mandaue
CEBU, Philippines — Nigradwar ang 25 ka person deprived of liberty sa bag-ong bilanggoan sa Dunggoan, Basak, Siyudad sa Mandaue sa gipahigayon nga Jail-Based Rehabilitation Program sa Bureau Jail Management and Penology ug Katatagan Kontra Droga sa Komunidad (KKDK) program sa Mandaue City Substance Abuse Prevention Office (MCSAPO) nga nilungtad og upat ka bulan nga gidugayon ubos sa tema nga “Team Kabag-ohan”.
Gihimo ang ilang graduation niadtong Hulyo 16, 2024 nga gipangulohan sa pagtambong ni Mayor Jonas Cortes, Konsehal Oscar Del Castillo nga maoy chairman sa Committee on Peace and Order sa konseho sa siyudad, kapolisan, Bureau of Parole and Probation ug uban pa.
Si Atty. Ebenezer Daryl Manzano, hepe sa MCSAPO nagkanayon nga 30 unta ka PDL's ang naapil sa second batch apan tungod kay sayo ang paggawas sa lima hinungdan nga 25 lang ang hingpit nga nigradwar sa maong programa.
Si Manzano nipasabot nga usa sa katuyoan sa maong programa mao ang pagpaloag sa bilanggoan ug ingon man paghingpit sa ilang pagbag-o sa ilang pagbalik ngadto sa katilingban. (BANAT NEWS)
- Latest
