DSWD nanghatag og pinansyal nga ayuda sa lungsod sa Alegria

CEBU, Philippines — Nanghatag og pinansiyal nga ayuda ang Department of Social Welfare and Development (DSWD) sa 1,550 ka indibidwal sa Central Visayas atol sa Bagong Pilipinas Serbisyo Fair nga gipahigayon sa Alegria, Cebu.

Ang DSWD ug uban pang partisipante nga ahensya sa gobyerno miduyog sa caravan nga gi organisar sa Office of the Presidential Assistant for the Visayas (OPAV) didto sa sports complex sa lungsod aron mapaduol ang mga serbisyo sa gobyerno ngadto sa mga tawo.

Ang 1,550 ka indibidwal nakadawat og P4,000 matag usa pinaagi sa Assistance to Individuals in Crisis Situations (AICS), usa sa mga programa sa DSWD nga nanalipod sa katilingban nga naghatag ug lain-laing klase sa tabang sa mga pamilya o indibidwal nga nanginahanglan.

Kini nga mga indibidwal gikan sa mga lungsod sa ika-7 nga distrito sa Sugbo, nga mao ang, Alcantara, Alegria, Badian, Dumanjug, Ginatilan, Malabuyoc, Moalboal, ug Ronda.

Atol sa kalihukan ang DSWD nagbutang og booth aron ipaambit ang impormasyon bahin sa mga serbisyo niini ug usa ka Public Assistance and Complaints Desk para sa mga pangutana sa partisipante.

Gipahibalo ni Regional Director Shalaine Marie S. Lucero, kinsa nangulo sa pag-apod-apod sa ayuda, nga nikabat na sa P6.2 milyones ang tabang pinansyal nga nahatag sa DSWD.

Gihatagan niya og gibug-aton ang suporta sa departamento ngadto sa Bagong Pilipinas Serbisyo Fair ug ang mga paningkamot nga mapaduol ang mga serbisyo sa publiko ug kasayuran sa gitanyag nga mga programa.

Ang DSWD miapil sa caravan pinaagi sa pag-apod-apod sa family food packs ug pinansyal nga tabang, pagpaambit sa impormasyon, pagtubag sa mga pangutana, ug pagpakita sa mga produkto sa panginabuhi gikan sa mga partner nga benepisyaryo niini.

Sa kinatibuk-an, 31,659 na ka mga indibidwal ang nakabenepisyo sa cash aid, ug 8,662 nakadawat sa food packs sukad sa paglusad sa maong programa sa rehiyon sa Central Visayas. (BANAT NEWS)