Kontraktor sa CCSC di bayaran kun di matarong
CEBU, Philippines — Usa ka adlaw sa dili pa mosira ang labing dakong sporting event sa nasud, “blangko” pa ang Cebu City Government sa mga pangutana kun substandard ba ang track oval sa Cebu City Sports Center (CCSC).
Samtang wala pa masulbad ang mga pangutana bahin aning track oval nga giingong wala makaabot sa 400-meter standard size, si acting Cebu City Mayor Raymond niingon nga aduna nay third party nga mohimo sa survey.
Matud niya, maghuwat pa sila sa ilang findings aron masuta kung kulang ba ang size niini. Hinuon matud niya nga kung mogawas ang kompleto nga assessment dungan sa ilang mga rekomendasyon, aduna na silay mga alternatibong pamaagi
Kun mogawas nga ang problema anaa sa structure, si Garcia niingon nga ila kining i-adjust apan nidugang nga magkinahanglan pa kini og dako nga civil works.
Kung ang problema makita usab sa mga markings, ang tibuok nga oval kinahanglan nga i-rehabilitate pag-usab.
“Ing-ana ka simple nga kanang ma 400 meters gyud siya. So as of now, blangko pa ko. I don’t know unsa, kay wa pa man guy final result ang ilahang independent contractor," matud ni Garcia.
Ang track oval sa CCSC mao ang primary playing venue sa pag-host sa Palarong Pambansa 2024.
Mao usab kini ang oval nga gigamit sa 1994 hosting nga natapos nga wala’y isyu kun kini substandard o kulang sa standard nga sukod.
Hinuon si Garcia miingon nga wa nila ibaliwala ang posibilidad nga nagkulang ang gidak-on tungod sa rehabilitasyon.
“We don’t know what added and what was taken along the way kay 30 years na gud to. But I hope na it was just a matter og katong pag marka nila nga medyo wa na mutakdo ba,” matud ni Garcia.
Siya nidugang, nga kun ang problema naa ra sa mga marka, ang Cebu City Government dili mobayad sa kontraktor gawas kun ilang ayuhon ang track oval, karon, nga adunay saktong markings.(BANAT NEWS)
- Latest
