2.5kg shabu nasakmit sa SACLEO
CEBU, Philippines — Bisan og nakatutok ang Police Regional Office-7 sa upat ka mga dagkong kalihukan sa Sugbo sama sa Palarong Pambansa 2024, National Schools Press Conference, National Festival of Talents ug Learners Convergence wala nila pasagdi ang ilang naandan nga pagpatuman sa law enforcement operations.
Pamatuod niini mao ang ilahang Simultaneous Anti-Criminality Law Enforcement Operation (SACLEO) gikan sa Hulyo 12 hantod sa petsa 14 sa samang buwan diin nakasakmit sila og dul-an 2.5 kilong shabu nga nagkantidad og P16.9 million; 850 ampules sa nubain nga nibalor og P340 mil ug 148 ka tawo ang sikop.
Sa illegal gambling operations, nakapahigayon ang kapulisan sa Central Visayas og 121 ka operasyon nga miresulta sa pagkasikop sa 191 ka tawo.
Nakasakmit sab ang kapulisan og P17,747 nga kwarta ug 121 ang kasong nasang-at. Mahitungod sa loose firearms nakahimo og 110 ka operasyon ang mga operatiba ug 109 ka armas ang nasakmit ug gi-surrender.
Napulo ka tawo ang nadakpan gawas niini nakasakmit sab sila og duha ka explosive. Samtang wala sab sila molugak sa ilang operasyon batok sa mga pinangita sa balaod.
Nakadakop sila og 141 ka wanted persons diin 11 niini most wanted person ug 130 ang other wanted persons.
Sa maong mga operasyon batok ilegal nga drugas, duha niini nadakpan sa managlahi nga operasyon sa Talisay City Police sa Mananga 1 ug Purok Matinumanon sa Barangay Tabunok.
Samtang sa Mandaue City, gikustodiya karon sa Department of Social Welfare and Development (DSWD) ang usa ka 17 anyos nga dalagita nga nadakpan sa kapolisan sa Presinto 5 atol sa buy bust operation human kini nakuhaan og unom ka paketeng gituohang shabu. (CEBU NEWS)
- Latest
