NUJP-CEBU: Opisyales ug media angay magkolaborasyon

CEBU, Philippines — Ang National Union of Journalist in the Philippines-Cebu chapter nikomento may kalabutan sa giingong media restrictions ug sa isyu may kalabutan sa reporting sa mga tigbalita bahin sa nagpadayon nga Palarong Pambansa 2024 sa Cebu City.

Ang pamahayag giluwatan sa NUJP-Cebu Chapter human atol sa gipatawag nga coordination meeting sa mga komitiba sa Palarong Pambansa nga gi cover sa mga sakop sa tigbalita, nanawagan si acting Mayor Raymond Alvin Garcia sa media tungod sa giingong ‘unfair reporting’ bahin sa mga problema sa suplay sa tubig sa usa sa mga billeting quarters sa mga delegado.

Giingong atol sa maong tigum, gikutlo ang acting mayor nga miingon nga: "ang nindot nga balita kay balita man, ang nindot maoy ibalita."

Sumala pa sa NUJP-Cebu nakadawat usab sila og taho nga pipila ka mga tigbalita ang gidid-an sa pagsulod sa pipila ka mga partikular nga lugar sa Palaro bisan gipasalig sa mga organizers nga gitugotan ang mga media nga mo-cover basta naa sila sa gigahin dapit sa venue para sa media.

Ang NUJP-Cebu Chapter matinahuron nga nipahinumdum sa mga opisyal sa siyudad nga ang mga sakop sa media wala mangita og isyu aron dunay masulat. Apan katungdanan sa media mao ang pagtaho sa mga kabalaka usab sa mga stakeholders.

Gipadayag sa NUJP-Cebu ang mga tigbalita walay tinguha pagbutang sa mga kabataan sa bisan unsa nga klase nga kadaut ug disturbo sa bisan unsa nga kalihukan sa Palaro.

Kini tungod kay may kaakohan ang media sa ilang safety ug pag practice sa gitawag nga “do-no-harm” nga prinsipyo.

Ang NUJP-Cebu Chapter nanawagan hinuon sa mga opisyales sa siyudad nga makigkolaborasyon sa media. --  IBM BANAT NEWS