Dizon maoy nihangyo nga mabalhin sa Oliva?
CEBU, Philippines — Si Mandaue City Treasurer Regal Oliva nipasangil kang Kongresista Emmarie "Lolypop" Ouano-Dizon nga maoy naghangyo sa pagpabalhin kaniya ngadto sa Navotas City.
Kini ang giluwatan nga pamahayag ni Oliva atol sa pakighinabi niini sa mga tigbalita. Matud pa ni Oliva nga aduna siya’y kasaligan nga tinubdan nga nagbutyag nga si Dizon ug ang pamilya niini maoy naghangyo sa pagpabalhin kaniya.
Si Oliva nagkanayon nga wala siya masayod unsay sala niya ngadto sa kongresista nga unta higala man sila ug paryente.
Si Oliva nipadayag sa iyang kasagmuyo og nagkanayon usab kini nga wala siya’y kasayoran nga ang usa ka outstanding city treasurer lukop nasud papahawaon ug pahulipan.
Gihagit ni Oliva ang kongresista nga mosulti sa matuod ug moangkon kini sa maong pasangil. Si Oliva nipadayag nga possible nga usa siya ka political collateral damage ug dili kini makiangayon.
Dugang ni Oliva nga kong molampos ang nagpaluyo sa pagbalhin kaniya daghan pa unya kining pahulipan gamit ang ilang political power.
Ang Banat News nipadala og mensahe kang Dizon aron makuha ang habig niini apan sa oras sa pagsuwat niining balita wala kini motubag sa maong mensahe. (BDB) BANAT NEWS
- Latest
