Merkado publiko sa lungsod sa San Fernando nasunog

CEBU, Philippines — Naugdaw sa sunog ang pipila ka bahin sa merkado publiko sa South Poblacion sa lungsod sa San Fernando kagahapon sa kadlawon.

Ang kayo nagsugod alas 3:05 sa kadlawon kini human usa ka ginganlan og Andoy nga giingong adunay deperensya sa pangisip ang miduslit sa mga trapal diha sa vegetable section sa merkado.

Ang kayo dali nga nikatap nga mikaon sa fruits section, dry goods ug pipila ka bahin sa isdaan.

Matud pa ni SFO1 Stephen Villanueva nga giisa nila sa first alarm ang sunog mga alas 3:06 sa kadlawon hangtud nga giisa nila kini sa fourth alarm alas 3:25.

Sigon pa ni Villanueva nga lakip sa nitabang sa pagpawong sa kayo mao ang kabomberohan sa silingan nga lungsod.

Na kontrolar ang kayo mga alas 5:00 ug hingpit nga napagong alas 5:19 sa kadlawon.

Nagpasalamat lang si Villanueva nga walay mga naangol ug nakalas sa sunog apan ang mga baligya ang nahurot sa pagkasunog.

Padayon pa nga nag imbistigar ang kabomberohan sa San Fernando labot sa danyos sa maong sunog. (BANAT NEWS)