Anti-Discrimination Ordinance ipatuman sa Mandaue

CEBU, Philippines — Gitinguha sa kagamhanan sa Siyudad sa Mandaue nga kahatagan og lig-on nga mga lakang ang paghatag og kasigurohan nga walay pagpihig ang paghatag og katungod sa katawhan.

Kini pinasikad  sa Sexual Orientation, Gender Identity, and Expression  (SOGIE)   nga matigayon ang katumanan pinaagi sa  pagpirma ni Mayor Jonas Cortes sa Implementing Rules and Regulations (IRR) sa Anti- Discrimination Ordinance (ADO) subay usab sa pagsunod sa prinsipyo sa SOGIE nga maoy nagsilbing ngipon sa ipatuman nga lokal nga ordinansa sa kagamhanan sa maong dakbayan.

Nasayran nga ang maong  Anti-Discrimination Ordinance o (ADO) ang napalabang niadto pang tuig 2016 apan wala mahingpit sa pagpatuman tungod kay wala pa usab mapalabang ang IRR sa  maong ordinansa.

Si Magdalena Robinson, executive director sa Cebu United Rainbow LGBT Sectors,Inc. nagkanayon nga bisan pa man sa kakuwang sa IRR sa maong ordinansa ang kagamhanan sa siyudad ang nakapahigayon na sa pagtagad sa pagpihig sa mga LGBT.                          

Naglakip niini ang pagpatuman sa mga tunghaan sa ilang dili makiangayong polisiya sa matang sa tupi ug dili paghatag og pagtugot sa mga tinun-an nga mogradwar kon dili mosunod sa tukmang tupi ug isul-ob niini.

Samtang gihatagan usab og pagtagad sa kagamhanan sa siyudad ang dili makiangayong pagtagad sa mga establisamento ngadto sa mga empleyado nga  sakop sa LGBT.

Ang kagamhanan sa siyudad adunay gigahin nga salapi alang sa LGBT organizartion sa pagahimuong mga kalihokan nga naglambigit sa SOGIE awareness ug ingon man pagselebrar sa tinuig nga Pride Month. (BANAT NEWS)