Sugboanon makabenipisyo sa dugang trabaho

CEBU, Philippines — Bag-ong oportunidad ang gitunol sa Motolite Express Hatid Cebu dili lang sa ilang mga konsumidor nga mapasayon ang serbisyo apan makahatag usab kini og dugang trabaho sa mga Sugbuanon human kini nagbukas alang sa mga technician, riders ug call center agent nga maoy tigtubag sa mga tawag sa pipila ka mga dapit sa Metro Cebu.

Kini ang gibutyag ni Natalio Omictin, regional sales manager sa Motolite.

Matud pa ni Omictin nga bag-o pa ang paglusad sa ilang services sa Cebu hinungdan nga oportunidad kini sa mga bag-ong technician nga adunay kahibalo sa proper handling sa mga battery, pag-diagnosed ug pag-operate ilabi na libre ang ilang serbisyo nga ihatag ngadto sa ilang mga konsumidor.

Si Omictin nagkanayon nga mas daghan pa unya kini ang ilang mga technician ilabi na nga palapdan pa nila ang ilang serbisyo ngadto sa publiko.

Gibutyag ni Omictin nga adunay mga call center agent nga makatrabaho diin sila ang tigtubag sa mga tawag.

Ang Motolite Express Hatid pormal nga gilusad sa Cebu diin maghatag kini og serbisyo sa mga Sugbuanon og free delivery installation ug trade in services.

Ang maong serbisyo maghatag kini og kasayon sa mga konsumidor nga dili na moadto sa mga outlet ilabi na kadtong makasinati og problema diha sa kadalanan panahon sa mga dili maayong mga lakat sa panahon ug uban pa.

Ang pagbaton og riders sa MEH dugang oportunidad usab kini sa mga motorcycle riders ilabi na kong sila mahimo na unyang mga trabahante.

Gihatagan usab sa pagtagad sa kompaniya ang kalikupan hinungdan nga ilang giawhag ang mga konsumidor sa pagbaligya ug sa pagpa-trade-in sa ilang mga karaan nga battery aron mahipos kini sa husto ug dili makadaot sa kinaiyahan.

Ang maong mga battery dalhon kini ngadto sa ilang partner diin ipahigayon ang husto nga proseso sa paghipos niini lakip usab sa pag-recycle sa pipila ka mga butang nga mahimo pa nga mapahimuslan ug mahimo na usab kining bag-o. (BANAT NEWS)