Buwan sa Hulyo gideklara nga National Census Month

CEBU, Philippines — Gideklara ni Presidente Ferdinand Marcos, Jr. isip National Census and Community-based Monitoring System Month ang buwan sa Hulyo 2024 isip suporta sa pagpahigayon sa 2024 census of population ug CBMS (POPCEN-CBMS) gikan sa buwan sa Hulyo hangtud Septiyembre 2024.

Sa duha ka pahina nga Proclamation No. 627 nga gipirmahan ni Executive Secretary Lucas Bersamin niadtong Hulyo 9, 2024 ang National Economic and Development Authority (NEDA) pinaagi sa Philippine Statistics Authority (PSA) gimandoan sa pagpangulo, pag-coordinate, ug pagdumala sa pagbantay.

Tanang ahensiya ug instrumental sa nasudnong kagamhanan lakip na ang government-owned o controlled corporations ug state universities and colleges gimandoan sa pag-obserba sa selebrasyon.

Ubos usab sa proklamasyon, ang tanang local government units, non-government organizations, professional associations, ug pribadong sektor, giawhag usab sa paghatag og suporta ug tabang sa NEDA ug PSA ug sa aktibong pag-apil sa pag-obserba sa National Census ug CBMS Month.

Kini pinaagi sa paghatag og matinud-anon ug kompleto nga impormasyon isip tubag sa mga pangutana sa census ubos sa kasamtangan nga mga balaod, mga lagda ug mga regulasyon.

Subay sa Executive Order (EO) No. 352 (s. 1996) kinahanglang ipahigayon sa tibuok nasud ang census ug mga survey lakip na ang pagmentinar/pagproseso sa mga record nga nakabase sa administratibo.

Kini naglakip sa POPCEN matag 10 ka tui, ug ang tunga-tunga sa dekada nga POPCEN matag lima ka tuig.

Ang POPCEN-CBMS usa ka nasudnong kalihokan sa gobiyerno nga naglakip sa pagkolekta, pag-compile, pagtuki, pagmantala, pagpakatap, ug evaluation sa datos sa populasyon count, demograpiko ug socioeconomic nga mga kinaiya sa populasyon, estadistika sa pabalay ug uban pang may kalabotan nga datos gikan sa lebel sa barangay pataas ngadto sa rehiyonal nga sakop. (BANAT NEWS)