P4.5 milyones gigahin sa NFA-7 aron ipalit og bugas humay

CEBU, Philippines — Mokabat sa P4.5milyones ang gigahin sa National Food Authority Central Visayas alang sa pagpamalit og humay tipasi gikan sa mga mag-uuma diin target nilang makapalit og 3mil ka sakong tipasi sa humay.

Ang acting Regional Economist sa NFA-7 Haiza Klaudine Intano, nitug-an nga ang pagpamalit og bugas ubos kini sa Palay Procurement Program sa NFA.

Kini aron adunay igong suplay sa bugas nga magamit panahon sa emergency o kalamidad.

Sa pagka karon adunay dili mominos sa 14 ka buying stations ang NFA nga nahimutang sa Central Visayas.

Ang presyo sa pagpamalit sa tipasi sa humay sumala pa ni Intano, gibase kini sa prevailing buying price sa merkado aron madasig ang mga mag-uuma nga mobaligya niini ngadto sa buhatan sa NFA.

Andam usab ang NFA nga moadto sa mga dapit nga maglisod ang mga mag-uuma sa pagdala sa ilang mga ani ngadto sa mga buying stations.

Una na nga gipasalig sa National Food Authority Central Visayas (NFA-7) nga way nahitabong shortage sa supply sa bugas dinhi sa rehiyon.

Ang assistant regional director sa NFA-7 Diocano Alojado Jr., mipasalig niini atol sa Provincial Price Coordinating Council meeting diha sa Kapitolyo.

Sa pagkakaron dunay 413,000 ka bags sa NFA rice ang naa sa ilang mga bodega ug sa pagkakaron ang ilang stock gipaabot nga moabot og 750,000 ka bags sa higayon nga moabot na ang imported nga supply karong buwan sa Oktubre. (BANAT NEWS)