Chan mohatag og incentive sa makakuha og medalya sa Palaro

CEBU, Philippines — Gipahibalo ni Lapu-Lapu City Mayor Junard "Ahong" Chan nga mohatag siya og cash incentive sa mga atletang Oponganon nga makalangkat og medalya sa Palarong Pambansa 2024.

Personal usab nga gibisita ni mayor Chan ang venue sa Palaro diha sa Cebu City Sports Center sa dakbayan sa Sugbo sa tinguha nga ipabati sa mga atletang Oponganon ang suporta sa kagamhanan sa dakbayan.

Kauban ni Mayor Chan sa pagbisita ang unang ginang sa dakbayan ug kongresista sa Lone Congressional District sa siyudad sa Lapu-Lapu Congresswoman Ma. Cynthia "Cindi" King Chan.

Suma pa ni mayor Chan nga sukad pa kaniadto hangtud karong panahona wala gayuy paghupas ang iyang suporta para sa mga atleta.

"Nindot kaayo makita ang tanang mga partisipante sul-ob ang ilang colorful nga mga uniforms bitbit ang pangalan sa ilang tagsa-tagsa ka mga eskwelahan, " segun pa ni Chan.

Sa nasayran ang Palarong Pambansa maisip usab nga usa ka tinuig nga panagtapok sa mga atleta sa nasud gikan sa 17 ka mga rehiyon alang sa usa ka indigay sa katakus sa natad sa paugnat sa kusog.

Naglakip sa mga duwa mao ang archery, arnis, volleyball, sepak takraw, swimming, football, gymnastics, boxing, chess, baseball, aquatics, athletics, futsal, softball, table tennis, taekwondo, tennis, billiards, wrestling, aerobic gymnastics, dancesport, wushu, track events ug mga traditional games sama sa kadang-kadang, tumbang preso ug patintero. (BANAT NEWS)