Kumingking sa PWD napahak human paaka sa iyang karibal

CEBU, Philippines — Napahak ang kumingking sa kamot sa usa ka 30-anyos nga person with disability nga babaye human kini paaka sa giingong uyab sa iyang kapuyo.

Nahitabo ang komosyon diha sa panimalay sa biktima sa Purok Cainta 1, Barangay Pooc, Dakbayan sa Talisay niadtong Martes sa buntag.

Ang kapuyo sa biktima nagpangedaron kini og 33-anyos, usa ka panday-mason samtang ang giingong uyab niini nagpangedaron og 43-anyos, buwag sa bana, lumad nga taga Lungsod sa Dumanjug.

Base sa imbestigasyon sa kapolisan nga nakadungog ang biktima og tuktok sa pultahan ug iyaha kining gikanaog ug iyang nakita ang iyang kapuyo ug ang uyab niini nga nag-estoryahanay diha sa sala.

Giingong ang suspetsado nisulong kini tungod kay gibawian niini sa cellphone, alahas ug yawi sa motorsiklo ang lalaki.

Gikomprontase sa biktima ang suspek ug nigawas kini apan nibalik og sulod ug gibunlot ang buhok sa biktima.

Ug gumikan sa komosyon ang biktima wala makabantay nga napaakan na diay ang kumingking sa iyang tuong kamot diin nalahap gyud kini ug wala na makita ang gamay’ng parte sa iyang kumingking nga natang-tang.

Ang biktima wala makabatyag og sakit niadtong higayona diin nakabantay na lang kini nga nagkadugo na ang iyang kamot ug gibuhian ang buhok sa suspetsado.

Niresponde ang barangay sa maong hitabo diin gidala diha sa Talisay City Police Station ang biktima ug suspetsado.

Sa pag-atubang sa biktima ug suspetsado diha sa barangay nasayran nga ang suspetsado maghatagan og binuwan nga kwarta sa lalaki nga idata sa motorsiklo ug giingong nag-ipon na usab sila sulod sa pila ka adlaw ug dihang niuli ang lalaki sa biktima giadto kini sa suspek aron bawian sa iyang mga nahatag.

Gikataho nga ang duha ka habig nagkasabot nga maghusay sila sa barangay ug nagpimahay kini.  Apan kagahapon nipadayag ang biktima nga mopasaka kini og kaso batok sa suspetsado. — Irish L. Laborte, John Mark P. Dejito (BANAT NEWS)