Ikapito sa mga na-missing sa Carmen napalgan na

CEBU, Philippines — Napalgan na ang pito ka indibidwal nga na-missing sa Lungsod sa Carmen human gianod sa baha ang gisakyan nilang pick up diha sa Barangay Lower Natimao-an niadtong Lunes sa hapon.

Napalgan na ang lawas sa ikapito nga biktima nga si Mike Stanley Tungal, 15-anyos diha sa kadagatan sa Lungsod sa Sogod kagahapon sa udto.

Kini human gisuhid sa mga rescuer nga naglangkub sa Philippine Coast Guard ug sa Carmen Municipal Disaster Risk Reduction and Management Office ang kadagatan.

Ang maong mga nakalas lakip kini sa 17 ka sakay sa pick-up nga gianod sa baha pasado niadtong Lunes sa hapon.

Ang napulo ka kauban sa mga biktima ang naluwas kini human nakapatong sa dakong bato.

Ang opisyales sa Office of the Civil Defense-7 mihimo na og pakisusi sa maong dapit diin nahitabo ang insidente diin nakita nila ang ka peligro sa dapit panahon nga mobundak ang ulan hinungdan nga aduna sila’y rekomendasyon matud ni Director Joel Erestain sa OCD-7.

Si Engineer Al Quiblat, pangulo sa PAGASA Visayas nagkanayon nga usa ka flash flood ang nahitabo sa Lungsod sa Carmen tungod sa nasinating torential rain niadtong mga orasa.

Ug gumikan sa kakusog sa pagbundak sa uwan nakabubo kini og daghang tubig nga susama gidaghanon sa 40 standard Olympic size swimming pool gikan sa alas 4:00 sa hapon hangtud na sa alas 6:00 sa gabii o sulod sa duha lang ka oras.

Giklaro sa PAGASA nga walay cloud burst nga nahitabo niadtong panahona.

Nunot niini, ang Department of Social Welfare and Development- 7 Disaster Response Teams ug Municipal Action Teams (MATs) nga sa niaging gabii lang na establisar anaa sa mga open camps sa mga Lungsod sa Liloan, Carmen, ug Catmon.

Ang grupo nitabang pagsuta sa sitwasyon ug profiling sa mga pamilya nga naapektohan sa bag-ohay lang nga kusog nga pagbunok sa ulan sa Sugbo sayo niining semanaha.

Gipahinumdoman sa DSWD ang mga apektado nga magpabiling mabinantayon ug alerto ug makigtambayayong sa ilang mga local executive aron malikayan ang bisan unsang dili maayong mga insidente tungod sa dili maayo nga panahon.  — Rowena D. Capistrano, Gie-Ann Tapic (BANAT NEWS)