Palarong Pambansa 2025 ipahigayon sa Loag City

CEBU, Philippines — Gihulagway sa Cebu City Police Office (CCPO) nga hapsay ug malinawon ang pagbukas sa Palarong Pambansa 2024 niadtong Martes.

Matud ni Police Lieutenant Colonel Janette Rafter, deputy city director for administration sa Cebu City Police Office nga mapasalamaton sila sa kooperasyon sa katawhan ingon man suporta sa ilang partner agencies nga nakatampo aron magmalampuson ang kalihokan.

Gibana-bana nga 20,000 ka tawo ang nisalmot ug nisaksi sa labing dakong sporting event opening sa niaging adlaw.

Walay nadawat nga report ang kapolisan nga adunay nabiktima sa krimen sama kawat, labni ug uban.

Padayon ang pagpahugot sa CCPO sa ilang seguridad hangtoud nga mahumam ang kalihokan sa Palarong Pambansa 2024.

Walay nadawat usab nga report ang kapolisan nga adunay problema sa billeting areas ug venues sa mga duwa.

Gihangyo sa CCPO ang mga manan-aw sa duwa nga mosabot sa mga palisiya nga ipatuman ug ilang giklaro nga dili sila did-an nga makatan-aw sa mga duwa.

Subay niini, gikataho nga ang Laoag City sa Ilocos Norte maoy mo-host sa Palarong Pambansa 2025.

Kini ang gikonpirma ni Department of Education Assistant Superintendent Adolf Aguilar ug Cebu City Sports Commission Chairman John Pages.

Matud sa maong mga opisyal nga ang maong pahibalo gikonpirma na kini sa nilabay nga tuig human sa Palarong Pambansa nga gipahigayon sa Marikina City.

Ang Palarong Pambansa 2026 ipahigayon sa Mindanao apan kong asa kini ipahigayon ipahibalo kini atol sa pagtak-op sa Palarong Pambansa sa Dakbayan sa Sugbo karong umaabot nga Martes, Hulyo 16, 2024.

Si Senador Imee Marcos atol sa iyang pagbisita sa Sugbo nibutyag nga uban sa iyang anak nga si Governor Matthew Manotoc nangandam na usab sila karon alang sa dakong kalihokan sa paugnat sa kusog. (BANAT NEWS)