Ouano nihimakak nga siya nagpaluyo sa pagbalhin ni Oliva

CEBU, Philippines — Kusganong gipanghimakak ni Kongresista Emmarie "Lollypop" Ouano-Dizon ang mga pasangil nga siya ang nagpaluyo sa tinguha nga pagbalhin ni Atty Regal Oliva, ang city treasurer sa siyudad sa Mandaue.

"Kami we have always been silent, kay di mi ganahan ug mag gubot gubot. Kaning ilaha speculations ra gyud. Naa ba guy nakit-an nga endorsement gikan namo? Naa ba gud mi letter nga nihangyo papahawaon siya?" suma pa ni congresswoman Ouano-Dizon dihang nahinabi sa mga tigbalita.

Dugang pa niya nga siya isip miyembro sa congress sagad makadawat siya og request for endorsement.

"Kami as congressmen, bisan kinsa mo seek og endorsement, daghang mangayo namo og endorsements. Dili man necessary nga if naay endorsement, kami na dayon ang pasanginlan," gitataw niya sa iyang pamahayag.

Matud pa sa kongresista nga normal ra nga mabalhin og lain-lain nga siyudad o municipality ang usa ka treasurer ug isip usa ka career officer kinahanglang gyud kini nga motuman sa mando sa labaw nga buhatan.

Samtang ang LGBTQAI Plus Community sa siyudad sa Mandaue ang nagtapok usab kagahapon sa Mandaue City hall. Kini nunot sa pagpirma ni Mandaue City Mayor Jonas Cortes sa Implementing Rules and Regulations (IRR) sa Anti -Discrimation Ordinance.

Human sa maong pagpirma ang LGBTQIA Plus community sa dakbayan nga gipangulohan ni Reglyn Bihag nagmartsa ngadto sa buhatan ni kongresista Ouano-Dizon diin ilang gihimo ang pipila ka gutlo nga pag-rally. (BANAT NEWS)