Katukoran sa Phase 2 sa pantalan sa Santa Fe giuyonan

CEBU, Philippines — Gihatagan og pagtugot sa hunta probinsyal si gobernadora Gwendolyn Garcia nga mosulod og kontrata uban sa pribadong kompaniya alang sa katukoran sa Phase II sa bag-ong pantalan sa Santa Fe sa isla sa Bantayan.

Ang maong proyekto nga itukod sa Phase II nagkantidad og sobra P110 million nga gipanglantawan nga mosulbad sa pagkabanlas sa balas ug dili makiangayon nga distribusyon sa balas sa lungsod sa Santa Fe, nga giila nga usa sa mga tourism destination sa Probinsya tungod sa maanindot nga white sand beach.

Ang provincial board niaprobar sa resolusyon nga gipangamahanan ni bokal Red Duterte sa kinto distrito alang sa maong katuyoan nga pagtugot kang Garcia nga makigkontrata sa kontraktor nga motrabaho sa maong pantalan.

Ang proyekto gihulagway sa Kapitolyo nga “environmentally friendly”.

Tukoron ang pantalan tupad ra sa kasamtangang pantalan sa Santa Fe diin ang sukod niini susama ra sab sa sukod sa karaan.

Ang maong proyekto itukod ubos sa upat ka phase nga adunay P500 milyon nga budget.

Ang Cebu Port Authority (CPA) nihatag na og pagtugot sa Probinsa sa Sugbo nga maoy modumala sa maong pantalan kon matapos na ang konstruksyon niini. MEL BANAT NEWS