Unom na ka brgy sa Cordova ang gideklarar nga drug cleared

CEBU, Philippines — Gihangop ug gikalipay ni Cordova Mayor Cesar Didoy Suan nga gideklarar nga drug cleared ang unom sa trese ka barangay sa Cordova.

Subay niini nanghinaut si mayor Suan nga magpadayon ang mga pagpaninguha nga ang tibuok lungsod sa Cordova o tanang mga barangay mahimo nga drug-cleared barangay.

Sumala pa ni Suan, ang mga opisyal sa Philippine Drug Enforcement Agency kon PDEA mobisita sa ilang lugar aron personal nga i-presentar ang award ngadto sa upat ka mga barangay.

Ang mga barangay nga gideklarar nga drug cleared mao ang Barangay Poblacion, Day-as, Pilipog ug Dapitan.

Una nang nadeklarar nga drug cleared ang Barangay Ibabao ug San Miguel base sa Regional Oversight Committee.

Samtang duha ka durugista sa Dakbayan sa Talisay ang nadakpan sa gihimo nga buy bust operation sa kapolisan.

Unang operasyon gihimo niadtong Domingo sa kadlawon sa Barangay Tabunok.

Nadakpan ang usa ka 39 anyos nga lalaki nga taga Bario Luz, siyudad sa Sugbo nga nakuhaan og 70 gramos nga shabu nga adunay balor nga P476mil.

Wa magdugay, nadakpan sab ang usa ka 29 anyos nga usa ka E-bike drayber didto sa Barangay Tanke.

Ang drugas nga nasakmit niabot sa 125 gramos nga adunay gibana-bana nga balor nga P850mil.

Ang duha ka mga dinakpan gibalhug sa bilangguan ug gikatakdang pasakaan og kaso. MEL BANAT NEWS