Babaye nga nanagit og sakyanan sikop sa HPG

CEBU, Philippines — Nag-atubang og kasong falsification of public documents ug carnapping ang usa ka babaye nga giingong nalambigit sa rent-tangay ug rent-sangla nga modus.

Ang suspetsado mao si alyas “Czarmen”, hingkod ang panuigon, residente sa No. 2, Rochelle Homes, Tikyan Uno, Barangay Banilad, Dakbayan sa Mandaue.

Si Police Lieutenant Colonel Wilbert Parilla, hepe sa Highway Patrol Group (HPG)-7 nagkanayon nga ang suspetsado niabang og Mitsubishi Xpander Cross sa usa ka negosyante nga taga Barangay Tisa niadtong Hunyo 17, 2024.

Giingong ang suspetsado wala mo uli sa sakyanan nga iyang giabangan ug dili na usab ma-contact ang numero niini sa telepono nga gibutang diha sa kontrata.

Ang tag-iya sa sakyanan nagpatabang kini sa HPG-7 aron mabawi ang nahisgutang sakyanan ug madakpan ang suspetsado.

Ang suspetsado nasikop atol sa gipahigayon nga manhunt operation sa HPG-7 ug nabawi ang Mitsubishi Xpander Cross nga dunay plate number nga GBA-4530 ug laing sakyanan nga Toyota Avanza nga adunay plate number nga GAP-8186 gikan sa usa ka hotel nga nahimutang sa Barangay Subangdaku, Dakbayan sa Mandaue niadtong Hunyo 22, 2024 sa buntag.

Samtang wala na madokumento ang laing tulo ka sakyanan nga nabawi usab sa mga tag-iya niini.

Ang nahisgutang mga sakyanan giparada diha sa parking lot sa maong hotel diin gipadala kini sa mga tag-iya human nakapakita og dokumento nga nagpamatuod nga sila ang tag-iya.

Matud ni Parilla nga ang modus sa suspetsado mao ang pag-abang og mga sakyanan nga gi-post sa marketplace.

Giingong abangan nila ang sakyanan og taas nga panahon base sa kontrata nga pirmahan sa ilang biktimahon ug mohatag og dili tinuod nga dokumento sama sa lisensiya ug uban pa.

Human makahatag og down payment sulod sa pila ka adlaw ang suspetsado mohimo og peke nga dokumento sa Land Transportation Office nga kunohay kamatuoran nga ang maong sakyanan nabalhi na sa iyang pangalan.

Nasuta sa PNP e-warrant system nga adunay  pending warrant of arrest sa kasong falsification of public document sa sala ni Regional Trial Court (RTC)Judge Charina Gopico Navarro-Quijano sa Municipal Trial Court in Cities Branch 2 sa Dakbayan sa Talisay nga adunay P36,000 nga piyansa alang sa temporaryon kagawasan sa suspetsado. (BANAT NEWS)