Bantay Dagat nihanghyo sa PCG pagbutang og personnel
CEBU, Philippines — Ang Bantay Dagat Commission sa Dakbayan sa Sugbo nihangyo sa Philippine Coast Guard Station Cebu nga magbutang og personnel sa pag-establisar og outpost sa Cebu City Bantay Dagat Forward Operating Base ug pagpahigayon og regular nga pagpatrolya batok sa Illegal, Unregulated, and Unreported (IUU) fishing sa municipal waters sa Dakbayan sa Sugbo.
Atol sa tigom sa commission niadtong Biyernes gihangyo ang Coast Guard nga magtukod og makeshift detachment aron magpatrolya sa kadagatan boundary sa Talisay ug Cebu City.
Ang resolusyon giumol tungod sa pagbalik sa liba-liba o Danish Seine fishing method diha sa kadagatan sa siyudad diin delikado nga makahurot ang mga isda.
Ang liba-liba usa kini ka ilegal nga pamaagi sa panagat nga gidili sa fisheries code sa Pilipinas ubos sa Akta Republika 8550 nga gi-amendar sa Akta Republika 10654 tungod kay dili maayo ang epekto niini sa coral reefs, sea grass bed, ug marine habitats.
Si Ed Carlon Rama, bag-ong program director sa Bantay Dagat Cebu City nagkanayon nga dili kumon sa Dakbayan sa Sugbo ang pamaagi.
Matud ni Rama nga nagpahigayon sila og socioeconomic demographics survey sa 11 ka existing coastal barangays nga anaay fisher folks community diin ang pagpamasol ug pamanggal o fish trapping ang pamaagi sa pangisda ang ilang gigamit.
Sukad sa Bagyong Odette niadtong tuig 2021 nahunong ang operasyon sa Bantay Dagat ubos sa liderato sa kanhi program director nga si Ariel Yburan tungod sa kakuwang sa bangka.
Si Yburan ang gihulipan kini ni retired colonel Alexander Soledad ug ang naulahi gihulipan usab kini ni Rama.
"So since sa akong term nagbalik ta og seaborne operation using privately owned boats and personally purchased na oil para lang makapatrolya ta while at the same time requisitioning with the city government na mapalitan tag bag-o nga bangka," matud ni Rama.
Apan giingong bisan pa sa regular nga pagpatrolya dili nila masikop ang mga malapason tungod sa kakuwang sa mga deputized fish wardens nga modakop. (BANAT NEWS)
- Latest
