Most wanted sa Caraga sikop sa PRO-7
CEBU, Philippines — Nasikop sa Police Regional Office-7 niadtong Sabado sa hapon diha sa Barangay Canduman, Dakbayan sa Mandaue ang ikaduhang most wanted person sa Caraga Region niadtong Hulyo 6, 2024.
Dala sa kapolisan ang warrant of arrest batok sa suspetsado nga giluwatan ni Regional Trial Court (RTC) Judge Francis Rafil sa Branch 4 sa Butuan City, Agusan Del Norte.
Walay girekomendar nga piyansa ang korte alang sa temporaryong kagawasan sa 21-anyos nga suspetsado kinsa lumad nga taga Bonbon, Butuan City, Caraga.
Base sa report, nasikop sa mga personnel sa Police Station 6 sa Mandaue City Police Office (MCPO) uban sa Regional Intelligence Division ug Regional Police Drug Enforcement Unit sa Police Regional Office-13 ang no. 2 most wanted sa Caraga Region tungod sa kasong pagpanglugos.
Si Police Brigadier General Anthony Aberin, director sa PRO-7 nidayeg sa operating units tungod sa ilang hugot nga intelligence driven operation hinungdan sa pagkasikop sa suspetsado. Dugang ni Aberin nga ang maong kalamposan gumikan kini sa pagtinabangay sa kapolisan, komunidad, ug uban pang mga stakeholder. (BANAT NEWS)
- Latest
