Modus nga Salisi naaktohan sa video sa mga biktima

CEBU, Philippines — Viral karon sa social media nga Facebook ang video sa duha ka mga babaye nga samtang nagduwa sa arcade station sa usa ka mall sa Barangay Mabolo diin dunay usa ka lalake nga nisuwat og kuha sa cellphone sa usa nila nga naa, apan dali dayun nabawi kay nakabantay ang biktima.

Ang nag post sa video mao ang usa ka Angelene ug kuyog niya mao iyahang amiga nga si Alexa. Matud pa nahitabo kini alas 2:04 sa hapon niadtong Huwebes, Hulyo 4, 2024.

Nagduwa sila sa Air Table Hockey sa arcade station ug ilang gamit gibutang sa kilid nga makita ra nila dayon. Apan samtang sila nagduwa, gimuntar sab ni Angelene ang cellphone niini aron sila mag-video samtang nagduwa kay managsa ra silang makitang duha.

Samtang gaduwa gasige og pasiplat si Alexa sa ilang gamit ug nakabantay siya nga dunay duha ka mga bata nga niagi.

Gisundan kini og babaye nga pareho nila og edad dayon kadtong lalake nga naka color blue nga jersey nga nikuha og foam sa bangko ug pasimpleng miduol sa nahimutangan sa gamit sa duha ug gipunit ang cellphone.

Kay nagbantay ng daan si Alexa nakita niyang nahanaw ang cellphone paglabang sa maong lalaki maong iyaha kining gisundan ug gibawi ang cellphone.

Matud pa, nag-sorry dayon ang maong lalaki.

"Niana ko Kuya, kuya, mao ‘to iyahang gihatag niingon siya sorry, sorry...Iyang gibutang ‘tong kuan sa bangko niingon siya sorry madungog sa video," sigon sa biktima.  Giklaro sa duha dili kadtong pang content ang video, handumanan ra unta nilang duha. Wala nasayod ang suspek nga duna diay video nga nag-roll diha sa tungod sa iyang gikawat nga cellphone maong nakuha iyang dagway ug lawas.

Gi-report sa mga biktima sa counter sa arcade station ang insidente nga hapit sila nakawatan ug gihatag sab nila ang video.

Ang maong hitabo nakaabot kang Cebu City Director Police Colonel Ireneo Dalogdog ug mimando sa Mabolo Police Station 4 pinangulohan ni Major Romeo Caacoy Jr. sa pagpangita sa maong lalake nga nanguha of cellphone.

"Usa sa atong action taken kinahanglan atong ma identify ang suspect kay klaro man kaayo iyahang nawong gyud sa video so hopefully makahatag ta og update bahin atong suspect," matud ni Dalogdog.

Nagpahimangno si Col. Dalogdog sa publiko nga dili mokompiyansa sa gamit ug sa mga establisyemento importante gyud ang CCTV cameras aron kun dunay panghitabo makuhaan og video. – IBM  BANAT NEWS