Drug den gironda, lima nadakpan

CEBU, Philippines — Human sa usa ka buwan nga gihimong surveillance wala na makaipsot sa mga tinugyanan sa balaod ang usa ka ilegalista dihang nadakpan kini sa buy-bust a City Drug Enforcement Unit sa Cebu City Police Office sa Barangay Duljo-Fatima ning siyudad sa miaging adlaw. Ang nadakpan mao si alyas Winston, 41, residente sa  Sitio May Flower, Spoliarium Street sa maong barangay nga giingong bodegero og illegal nga drugas.

Nakuhaan ang suspetsado og 403 grams sa gituohang shabu nga nagkantidad og P2.7 million.

Matod ni Police Major Jonathan Taneo, hepe sa CDEU CCPO si Winston nadakpan na kaniadto tungod gihapon sa ilegal nga drugas apan dihang nakagawas nibalik kini sa maong ilegal nga kalihokan.

"From main bodegero, ang main bodegero mogunit is mga 2 to 5 kilos tagaan na siya og usa ka kilo iyaha ng buk-on depende sa type of order sa lain-lain nga disposer mao tong naa siya'y tag 25 grams ug naa sad siya'y og tag 5 grams para og naay mo order motawag sa iyaha or sa iyahang amo sa Kalunasan mo ready na iya nalang na ihatag," matud ni Taneo.

Ang mga dinakpan pasakaan og kasong paglapas sa  Section 5 ug 11, Article II sa Republic Act 9165.

Sa pikas bahin, dili mominos sa P90 mil nga balor sa ginadili nga drugas ang nasakmit gikan sa gironda nga drug den diha sa Quijano Compound Barangay Calamba sa Dakbayan sa Sugbo,  Miyerkules sa hapon nga niresulta sa pagkasikop sa lima ka mga tawo.

Apil sa nasikop ang target sa operasyon nga tigmentinar sa drug den nga si Joel Parame, 49. Nasikop usab ang mga parokyano niini nga sila si Jurich Castillo, 19, dishwasher; Ace Gonzales,24; Alex Batulan,47 ug John Lloyd Algabre, 22.

Nasakmit gikan sa maong dinakpan ang lima ka putos sa gituohang shabu nga motimbang og 12gramos nga mobalor ug P81,600 base sa standard drug price value, buy-bust money, ug mga kagamitan sa ginadili nga drugas.

Matud pa ni Leia Alcantara, tigpamaba sa PDEA-7 dunay mga residente nga naghatag kanila og impormasyon bahin sa drug den mao nga gilusad ang operasyon. (BANAT NEWS)