PAGASA: Wala pa magsugod ang La Niña

CEBU, Philippines — Bisan taliwala sa kusog nga ulan nga nasinati sa pipila ka bahin sa Sugbo sa nanglabay nga mga semana wala pa kini nagpasabot nga nagsugod na ang La Niña.

Kini ang gibutyag ni Engineer Al Quiblat, pangulo sa Philippine Atmospheric Geophysical and Astronomical Services Administration (PAGASA)-Mactan

Matud ni Quiblat nga ang nasud anaa pa karon sa neutral phase sa El Niño Southern Oscillation (ENSO).

Si Quiblat nagkanayon nga ang ENSO adunay tulo ka hugna nga naglangkub sa El Niño, Neutral ug La Niña.

Nasayran nga ang nasud karon anaa na sa neutral phase human sa El Niño diin ang transition padulong sa La Niña.

Ubos sa neutral phase bisan asa sa El Niño ug La Niña ang mopasulabi.

Gipadayag ni Quibalt nga base sa ulahing climate forum nihinay ang invasion sa La Niña nga mo develop kini nagpasabot nga adunay pagkunhod sa kahigayonan sa La Niña nga mahitabo sa mosunod nga mga bulan.

Ug kong molambo ang La Niña gilaoman kini nga magsugod sa ulahi nga bahin sa tuig gikan sa Oktubre hangtud sa Disyembre kaysa Agosto hangtud sa Oktubre nga unang gikataho. (BANAT NEWS)