Aguilar: Bagyo ray makapakgang sa Palaro

CEBU, Philippines — Bisan mouwan pa o moinit mahinayon gyud ang pagbukas sa Palarong Pambansa karong Hulyo 9, 2024 sumala pa ni Dr. Adolf Aguilar, assistant school's division superintendent sa DepEd Cebu City.

Matud pa niya nahan-ay na ang tanan  apil sa gipangandaman ang mausab-usabon nga panahon.

Kun mouwan aduna nay mga kapote ug ubang mga gamit nga giandam, adunay nakaandam nga tents nga mamahimong mapasilongan sa uban ilabi na sa mga support group sa delegasyon.

Sumala pa ni Aguilar bagyo lang ang makapahunong kanila tungod kay dili nila irisgo ang kaluwasan sa mga delegado.

Gitug-an ni Aguilar, padayon ang ilang pakig-alayon sa Cebu City Disaster Risk Reduction and Management Office alang sa pagmonitor sa kahimtang ug lakat sa panahon.

Samtang nagpahigayon og ocular inspection ang kapulisan sa mga billeting areas sa mga delegasyon ug sa Cebu City Sports Center diin adto ipahigayon ang pagbukas sa maong dakong kalihukan sa paugnat sa kusog.

Si Police Col. Ireneo Dalogdog, ang pangulo sa Cebu City Police Office misusi sa Cebu City Sports Center, maoy nangunay sa pagsusi sa mga billeting areas sama sa Mabolo Elementary School diin anaa ang Cordillera Automous Region kon CAR, Guadalupe Elementary School, ug uban pa.

Sumala pa ni Dalogdog, adunay usa sa mga CCTV nga nakamontar sa mga billeting area ug tanan venue sa duwa sa national games, nakakonektar kini sa CCSC.

Giawhag ni Dalogdog ang mga nagdumala sa billeting areas nga monitoron gayud ang ilang mga CCTV camera tungod kay dako kaayo kini og tabang alang sa pagpadayon sa kahapsay ug kalinaw sa ipahigayon nga Palarong Pambansa.

Nagpahimangno si   Dalogdog sa mga police nga gipang deploy nga presentable sila kanunay.

Mapasalamaton sab sila sa Local Government Unit sanglit gihatagan sila sa ilang panginahanglanon sama sa pagkaon.

Ang pangulo sa Camp Management sa Cordillera Administrative Region miabi-abi sa mga bisita. (BANAT NEWS)