Bantayan aduna nay direktang flight sugod sa Agosto
CEBU, Philippines — Sugod sa bulan sa Agosto aduna nay regular nga direktang flight o biyahe sa eroplano gikan sa mainland Cebu padulong sa Isla sa Bantayan.
Ang King Aces Travel and Tours Services Inc. (KATTSI) molusad og regular nga flight padulong sa maong isla gikan sa Mactan Cebu International Airport (MCIA).
Ang maong kalamboan gipaabot nga makapadaghan og mga turista sa Bantayan Island nga giila na karon nga usa sa sikat nga suroyanan sa Probinsiya tungod sa nindot nga white sand beach.
Ang pagbiyahe usab padulong sa isla pinaagi sa eroplano makapadali sa biyahe gikan sa upat ka oras pinaagi sa bus ug ferry ngadto na lang sa 25 minutos.
Ang KATTSI molusad sa inaugural flight karong umaabot nga Agosto 28, 2024 diin bukas kini sa publiko nga gustong moadto sa Bantayan diin P888 ang pletehan o baayd sa ticket.
Base sa taho sa Sugbo News nga ang 72-seater sa ATR nga eroplano maoy mokarga sa mga pasahero padulong ug gikan sa isla ka duha sa usa ka semana o matag Biyernes ug Domingo pinaagi sa MCIA.
Si Gobernadora Gwendolyn Garcia gilaoman nga motambong sa inaugural flight human kini gidapit ni retired army general Gilbert Llanto nga maoy chairman sa Prime Aces Holdings Corporation (PAHC) usa ka subsidiary sa KATTSI.
Niadtong buwan sa Marso sa niaging tuig pormal nga giinagurahan ang Santa Fe Bantayan Island Airport sa Lungsod sa Santa Fe. Sa pagkakaron padayon ang Probinsya sa Sugbo sa paninguha sa pagpalambo sa maong tugpahanan pinaagi sa pagpalit og mga luna duol sa airport aron mapalapdan kini hilabina ang runway niini. (BANAT NEWS)
- Latest
