BFAR niapod-apod og fishing boats sa kahugpongan sa mga mananagat

CEBU, Philippines — Niabot sa 15 ka 62 footer fishing boats ang giapod-apod sa Bureau of Fisheries and Aquatic Resources (BFAR) ngadto sa kahugpongan sa mga mananagat sa tibook nasud diin gipahigayon kini diha sa Lungsod sa Carmen.

Apil sa nakadawat ang mga mananagat nga mga apektado sa bangi sa West Philippine Sea.

Ang grupo ni Fausto Albay sa Subic Commercial Fishing Association ang nituyo og anha sa Lungsod sa Carmen aron dawaton ang 62 footer fishing boat nga magamit nila sa ilang panginabuhian pagbalik sa ilang dapit.

Mahinangpon usab ang grupo ni Nisal Bontalgo sa region 4 sa ayuda nga gihatag kanila.

Ang maong mga grupo apektado karon sa bikil sa West Philippine Sea apan bisan pa og gikulbaan sa posibleng mahitabo padayon gihapon sila sa ilang namat-an nga panginabuhian.

Nasayran nga 15 sa 66 ka 62 footer fishing boats ang giuna sa pag-apod-apod sa BFAR ngadto sa mga kahugpongan sa mananagat lukop nasud.

Gitambongan kini sa opisyales sa BFAR, LGU sa Carmen ug ni Secretary Francisco Tiu Laurel, Jr. sa Department of Agriculture kinsa namulong atubangan sa fisher folks ug gisundan dayon kini sa ceremonial turnover sa miniature sa mga panagatan.

Gisunod usab ang blessing sa mga panagatan nga nakadunggo sa pantalan sa Carmen ug ang ceremonial breaking sa botilya sa bino ug ang hingpit nga pagtimon sa mga mananagat sa ilang nadawat nga panagatan.

Unang higayon kini nga nanghatag ang kagamhanan og 62 footer boats sa mga mananagat nga adunay kinatibuk-an nga gahin nga P660 milyones.

Gipaniguro usab sa mga naggama sa mga panagatan nga lig-on ug pulido ang fishing boat nga mugna sa extra ordinary fiber glass ug ubang mga kahimanan gikan sa laing nasud nga molungtad ngadto sa 20 ka tuig. (BANAT NEWS)