‘I-registro’ ilusad sa dswd aron hapsay ang paghatud og serbisyo

CEBU, Philippines — Ilusad sa Department of Social Welfare and Development (DSWD) ang ‘i-Registro’, usa ka dynamic social registry (DSR) nga adunay self-service social registration ug data authentication alang sa mga potensyal nga benepisyaryo sa ahensya.

Suma pa sa DSWD National Household Targeting Office (NHTO) Director Jimmy Francis Schuck II nga ang i-Registro nagtumong sa pagpauswag sa pagbinayloay sa na-update nga demograpiko ug pagbalhin sa datos.

Usa kini sa mga paningkamot sa digital transformation sa ahensya nga gidesinyo sa pagpahapsay sa paghatud sa mga serbisyo sa pagpanalipod sa katilingban sumala sa direktor sa NHTO.

Atol sa inisyal nga hugna, ang sistema magtutok sa self-service registration ug information authentication alang sa mga pregnant and lactating mothers (PLMs) gikan sa lungsod sa Pateros sa Metro Manila, Cordova sa Cebu, ug Floridablanca sa Pampanga, nga giila nga pilot sites alang sa proyekto.

Isip pagpangandam sa pilot launch, ang NHTO nipahigayon ug sunodsunod nga mga stakeholders' orientation activities niadtong Hunyo 24, 25, ug 27 uban sa mga kawani ug opisyal sa tulo ka local government units (LGUs), uban sa ilang barangay local government units (BLGUs). Gihatagan og gibug-aton sa direktor sa NHTO ang kamahinungdanon niini nga kalihokan ug ang pagtinabangay nga pamaagi sa pagsiguro sa hapsay nga panaghiusa ug pagsabut sa mga lokal nga stakeholder.

Dugang niya, pinaagi sa paggamit sa teknolohiya ug real-time nga pagbayloay sa datos, ang DSWD nagtinguha sa pagpalambo sa kaayohan sa mga kabus nga mga Pilipino ug pagsiguro sa patas nga pag-access sa mga importanteng serbisyo.

Ang inisyatibo sa i-Registro nahiuyon sa mga paningkamot sa nasudnong gobyerno nga himoong simple ang pag-access ug pagpalambo sa mga programa sa kaayohan sa katilingban. (BANAT NEWS)