Dali nga proseso sa e-Visa sa mga Indian gitinguha

CEBU, Philippines — Gimando ni Presidente Ferdinand R. Marcos Jr. niadtong Miyerkules, Hulyo 3, 2024 nga mas palamboon ang sistema sa e-Visa alang sa mga Indian national kay daku sila og tabang pagpalambo sa industriya sa turismo sa nasud.

Atol sa ika-6 nga tigum uban sa Private Sector Advisory Council (PSAC) Tourism Sector Group (TSG) sa Malacañang Palace, ang presidente miingon nga ang mas paspas nga pagproseso sa e-visa alang sa mga Indian national makatabang sa pagpalambo sa turismo sa nasud.

Nagkanayon si Lucio Tan, presidente ug CEO sa LT Group nga tungod sa kasamtangang sistema sa e-Visa diin ang paglukat niini kinahanglang personal pa nga adtoon sa embahada sa Pilipinas sa New Delhi ug mokabat sa usa ka bulan usa pa makuha, miresulta nga dili kaayo madanihon isip ilang destinasyon ang Pilipinas. Tungod niana, girekomendar ni Tan ngadto sa presidente ang pag-apil sa third party service provider nga magtukod, magpadagan ug magmentinar sa e-Visa system ubos sa paggiya sa mga hingtungdan nga ahensya sa gobyerno.

Sa pagkakaron, ang sistema sa e-Visa alang sa mga Indian national anaa pa sa beta testing, nga gi pilot lamang alang sa walk-in nga mga kliyente sa Philippine Embassy sa New Delhi.

Matud sa PSAC- TSG ang mga Indian nationals giila isip “repeat visitors” nga mogasto og $100 kada tawo kada adlaw sa Pilipinas diin 78 porsyento nila ang mo stay sa mga hotel. Dugang sa grupo nga ang paspas nga pagsaka sa ekonomiya sa India ug ang pagtaas sa middle class gilauman nga makatabang sa mga pagbiyahe sa gawas nga moabot sa 30 ka milyon sa 2025. (BANAT NEWS)