Kwarta nga gamiton unta sa lubong gihurot sa scammer

CEBU, Philippines — Gisamotan ang gihambin nga kaguol sa pamilya sa 4-anyos nga batang lalaki nga namatay human ang mga hinabang sulod sa e-wallet nga gamiton unta sa pagpalubong sa bata ang gihurot og kuha sa scammer.

Gikataho nga ang maong bata nga si Mark Louie Paraiso namatay kini human nahulog ug naugbok ang ulo niini sa semento diha sa daplin sa sapa ug nilahos pa gyud kini ngadto sa tubig niadtong Domingo diha sa Sitio Tal-ot, Barangay Inayawan, Dakbayan sa Sugbo.

Ang pamilya sa bata na-scam kini sa nagpaila nga buot motabang ug mohatag kanila og donasyon apan kinahanglan una nga ihatag ang ilang MPIN sa e-wallet.

Wala maghuna-huna ang pamilya sa bata nga binuangan diay sila tungod kay tinguha usab nila nga matabangan sila sa ilang kalisod ug gusto nila nga mapahiluna sa iyang kapahulayan nga dayon ang bata nahatag sa apohan niini ang MPIN ug nasakiyo sa scammer ang sulod sa e-wallet nga hinabang nga nikabat ngadto sa P16 mil.

Si Andrika Paraiso, apohan sa bata igo na lang kini sa paghilak sa hitabo tungod kay gisamotan sa mangingilad ang ilang kaguol. Si Paraiso nanawagan kini og tabang aron mapahiluna nila ang patay nga lawas sa iyang apo karong Biyernes.

Si Paraiso mapasalamaton sa tawo nga wala magpaila kinsa maoy nibayad sa  bayranan sa lungon sa bata diin ang bayranan sa sementeryo na lang ang ilang giproblema karon.

Gikataho nga sa wala pa madisgrasya ang bata nagpaabot kini sa iyang amahan tungod kay nisaad nga manglaag sila ug gituohan nga diha naghulat dapit sa sapa ug nakatagpilaw hinungdan nga natagak.

Ang pamilya sa bata nagkanayon nga kanunay’ng daghang tawo ang ilang dapit apan niadtong adlawa mingaw ug gani walay mga bata nga nagduwa-duwa sa maong dapit hinungdan nga taud-taod pa nga nabantayan nga naglutaw sa sapa ang biktima. (BANAT NEWS)